لاہور : کماہاں روڈ پر تیز رفتار کار کی موٹر سائیکل کو ٹکر سے میاں بیوی زخمی اور دو بچے جاں بحق ہوگئے۔ پولیس نے ڈرائیور کو حراست میں لے لیا۔
تفصیلات کے مطابق لاہور کے علاقے کماہاں روڈ پر موٹر سائیکل سوار میاں بیوی اپنے دو بچوں کے ساتھ جارہے تھے کہ سامنے سے آنے والی کار نے موٹرسائیکل کو ٹکر مار دی۔
تصادم اس قدر شدید تھا کہ حادثے کے بعد کار اور موٹر سائیکل قریب ہی نالے میں جا گریں، اس موقع پر وہاں موجود لوگوں نے اپنی مدد آپ کے تحت زخمیوں کو نالے سے نکالا۔
اطلاع ملنے پر علاقہ پولیس بھی موقع پر پہنچ گئی، اندوہناک حادثے میں میاں بیوی کو شدید چوٹیں آئیں لیکن ان کے دونوں بچے زخموں کی تاب نہ لاتے ہوئے جاں بحق ہوگئے۔
جاں بحق ہونے والے بچوں میں3سال کی مبشرہ اور2سال کی ایمان فاطمہ شامل ہے۔ زخمیوں کو فوری طور پر اسپتال منتقل کیا گیا۔ پولیس نے کار سوار شخص کو حراست میں لے لیا۔
