لاہور: صوبائی دارالحکومت لاہور میں ڈیفنس کے علاقے سے 20 سالہ گھریلو ملازمہ کی لاش ملی ہے۔
تفصیلات کے مطابق لاہور کے علاقے ڈیفنس سے 20 سالہ گھریلو ملازمہ کی لاش برآمد ہوئی ہے۔پولیس کا کہنا تھا کہ گھریلو ملازمہ عالیہ کوثر نے مبینہ طور پر خودکشی کی ہے۔
پولیس حکام کا کہنا ہے کہ مبینہ زیادتی سمیت دیگر پہلوؤں پر بھی تفتیش جاری ہے،لاش کے پوسٹ مارٹم کے بعد اصل حقائق سامنے آئیں گے۔
اس سے قبل 9 جولائی کو لاہور کے علاقے واپڈا ٹاؤن سے گھریلو تشدد کی شکار 8 سالہ ملازمہ کو بازیاب کرایا گیا تھا۔بازیاب کرائی گئی بچی کے ہاتھ،پاؤں، بازو، گردن اور کمر پر زخموں کے نشانات تھے۔
بعدازاں چائلڈ پروٹیکشن بیورو نے ستو کتلہ کے علاقے میں آٹھ سالہ گھریلو ملازمہ ثناء پر تشدد کا مقدمہ ملزم حماد کے خلاف مقدمہ درج کروایا تھا۔
یاد رہے کہ رواں سال یکم جنوری کو لاہور میں چوہنگ کے علاقے میں افسوس ناک واقعہ پیش آیا تھا جہاں 15 سالہ گھریلو ملازمہ ثناء کو تشدد کے بعد قتل کر دیا گیا تھا۔پولیس نے ملازمہ پر تشدد اور قتل کے الزام میں میاں بیوی کو حراست میں لیا تھا۔
