لاہور : کلمہ چوک سینٹر پوائنٹ کے قریب زیر تعمیر پلازہ میں خوفناک آتشزدگی سے پورا علاقہ سیاہ دھوئیں کے بادلوں کی لپیٹ میں آگیا ، فائر بریگیڈ کی چار گاڑیوں نے مسلسل کوششوں کے بعد آگ پر قابو پایا۔
تفصیلات کے مطابق لاہور کے علاقے کلمہ چوک سینٹر پوائنٹ کے قریب زیر تعمیر پلازہ کی بیسمنٹ میں ویلڈنگ کا کام جاری تھا کہ اچانک آگ کی چنگاری ساتھ رکھے تھرما پول کے ڈھیر پر جا گری ۔
دیکھتے ہی دیکھتے آگ نے پورے بیسمنٹ کو اپنی لیپٹ میں لے لیا اور علاقہ سیاہ دھویں کے بادلوں سے اٹ گیا، آتشزدگی کے وقت زیر تعمیر پلازہ کی بیسمنٹ میں بیس سے پچیس مزدور کام کر رہے تھے۔
اس حوالے سے ڈی سی او لاہور کا کہنا ہے کہ ریسکیو 1122نے بر وقت آپریشن شروع کرکے آگ پر قابو پایا، ضلعی انتظامیہ نے زیر تعمیر پلازہ میں آتشزدگی کی تحقیقات کا حکم دیدیا ہے ،اگر پلازہ کے مالک کی غفلت پائی گئی تو قانونی کاروائی کی جائے گی۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں