لاہور (25 فروری 2026): ایس ایس پی بیٹے سے اپنی بیوی کو بازیاب کروانے کے لیے سابق ڈی جی ایف آئی اے نے لاہور ہائیکورٹ سے رجوع کر لیا۔
چیف جسٹس لاہور ہائیکورٹ جسٹس عالیہ نیلم نے باپ کی بیٹے کے خلاف انوکھی حبس بے جا کی درخواست پر سماعت کی۔ درخواست گزار سابق ڈی جی ایف آئی اے میاں محمد امین نے استدعا کی کہ اُن کی بیوی کو بیٹے کی تحویل آزاد کرایا جائے۔
عدالتی حکم پر بیلف تنویر حسین نے بزرگ خاتون کو لاہور ہائیکورٹ پیش کیا، بزرگ خاتون کو وہیل چیئر پر کمرہ عدالت پیش کیا گیا، عدالت نے قرار دیا کہ اگر میاں بیوی اکٹھے رہنا چاہتے ہیں تو کیوں بیٹے نے زبردستی ماں کو رکھا ہوا ہے۔
ایس ایس پی اسپشل برانچ میاں افنان نے بتایا کہ ان کی ماں شدید بیمار ہے اور وہ ان کا مکمل خیال رکھ رہے ہیں، چیف جسٹس نے ریمارکس دیے کہ آئین مرضی سے زندگی گزارنے کا حق دیتا ہے، یہ بنیادی حق ہے، انھیں زبردستی کیسے رکھ سکتے ہیں۔
رمضان میں ڈرائیونگ لائسنس بنوانے والوں کے لئے اہم خبر آگئی
چیف جسٹس لاہور ہائیکورٹ نے عدالتی بیلف کے ساتھ بدتمیزی پر ناراضگی کا اظہار کیا کہ بیلف کے ساتھ بدتمیزی کیوں کی، یہ جرات کیسے ہوئی بیلف سے غلط زبان استعمال کرنے کی۔ ایس ایس پی نے بتایا کہ ایسا کچھ نہیں کیا گیا۔
عدالت نے بعد ازاں خاتون کو شوہر کے ساتھ جانے کی اجازت دے دی۔
عابد خان اے آروائی نیوز سے وابستہ صحافی ہیں اور عدالتوں سے متعلق رپورٹنگ میں مہارت کے حامل ہیں