The news is by your side.

Advertisement

کالعدم تنظیم کے لیے چندہ: سزا یافتہ ملزم لاہور ہائیکورٹ سے بری

لاہور: صوبہ پنجاب کے دارالحکومت لاہور میں کالعدم تنظیم کے لیے چندہ اکٹھے کرنے کے الزام میں سزا پانے والے ملزم کو ہائیکورٹ نے بری کردیا، عدالتی فیصلے میں کہا گیا کہ ثابت نہیں ہوا کہ ملزم کالعدم تنظیم کا عہدے دار تھا۔

تفصیلات کے مطابق لاہور ہائی کورٹ میں کالعدم تنظیم کے لیے چندہ اکٹھے کرنے کے الزام میں سزا پانے والے ملزم کی اپیل پر سماعت ہوئی، ملزم حسین شاہ کو انسداد دہشت گردی عدالت نے ایک سال کی سزا دی تھی۔

ہائیکورٹ نے ملزم کی اپیل پر سزا ختم کر کے بری کرنے کا فیصلہ دیا۔

عدالت نے کہا کہ ملزم سے ملنے والی رسید بک پر کسی تنظیم کا نام یا جھنڈا نہیں تھا، رسید بک سے یہ ثابت نہیں ہوتا کہ ملزم نے کس قسم کا چندہ اکٹھا کیا۔

عدالت کا کہنا تھا کہ ریکارڈ سے بھی ثابت نہیں ہوتا کہ ملزم کالعدم تنظیم کا رکن ہے، تفتیشی افسر کے مطابق بھی ملزم کالعدم تنظیم کا عہدے دار نہیں تھا، تفتیشی افسر نے ملزم پر کسی دہشت گردی میں ملوث نہ ہونے کا بھی بیان دیا۔

عدالتی فیصلے میں کہا گیا کہ استغاثہ نہیں بتا سکا کہ ملزم کا فنڈز اکٹھا کرنے کا کیا طریقہ کار تھا، استغاثہ کے مطابق ملزم سے رسید بک ملی جس سے 24 رسیدیں جاری ہوئیں، جن لوگوں کو رسیدیں دیں، حیران کن طور پر ان میں سے کسی کو شامل تفتیش نہیں کیا گیا۔

عدالت کا مزید کہنا تھا کہ استغاثہ یہ نہیں بتا سکا کہ یہ رسید بک کہاں سے پرنٹ ہوئی یا کس تنظیم نے جاری کی۔

Comments

یہ بھی پڑھیں