The news is by your side.

Advertisement

لاہور کی ترقی کیلیے اربوں روپے کے میگا منصوبوں کا اعلان

لاہور : وزیراعلیٰ پنجاب سردار عثمان بزدار نے لاہور کی ترقی کیلئے میگا منصوبوں کا اعلان کردیا، ان کا کہنا ہے کہ اربوں روپے کے ان منصوبوں سے شہر کو اس کا حق دیں گے۔

لاہور میں میڈیا سے گفتگو کرتے ہوئے انہوں نے کہا کہ فیروز پور روڈ پر9ارب روپے کی لاگت سے ایک ہزاربیڈ کاجنرل اسپتال بنائیں گے،400بیڈز جنرل،400کارڈ یالوجی،200بیڈز پر بلڈ ڈیزیز کا اسپتال بنے گا، نیا اسپتال ارفع کریم ٹیکنالوجی ٹاور کے قریب ایل ڈی اے کی اراضی پر بنایا جائیگا۔

وزیراعلیٰ پنجاب نے بتایا کہ گنگا رام میں مدر اینڈ چائلڈ کیئراسپتال 4ارب لاگت سے مکمل کیا جارہا ہے، چلڈرن اسپتال کو یونی ورسٹی آف چائلڈ ہیلتھ سائنسز کا درجہ دیا گیا ہے، چلڈرن یونیورسٹی کیلئے 4ارب روپے کی رقم مختص کی گئی ہے۔

عثمان بزدار نے کہا کہ سروسز اسپتال میں 2ارب 50کروڑ روپے کی لاگت سے ریڈیالوجی ڈیپارٹمنٹ بنایا گیا ہے، اس ریڈیالوجی ڈیپارٹمنٹ میں225بیڈز بھی فراہم کیے گئے ہیں، لاہور میں جناح اسپتال کے بعد ایک بھی نیا جنرل اسپتال نہیں بنایا گیا،

ایک سوال کے جواب میں ان کا کہنا تھا کہ لاہور میں تمام بڑی سڑکوں پر ٹریفک جام معمول بن چکا ہے، شاہ کام چوک اور کریم بلاک مارکیٹ چوک پر فلائی اوور بنائے جائیں گے، دونوں منصوبوں پر تقریباً6ارب روپے لاگت آئے گی۔

انہوں نے مزید کہا کہ فیروزپور روڈ پر ایک ارب روپے کی لاگت سے انڈرپاس بنایا جائیگا، ریلوے اسٹیشن سے شیرانوالہ گیٹ تک ساڑھے4ارب سے اوورہیڈبرج بنایا جائیگا۔

Comments

یہ بھی پڑھیں