The news is by your side.

Advertisement

لاہور: بینک سے رقم نکلوانے والا شہری گھر کی دہلیز پر لٹ گیا

لاہور: صوبہ پنجاب کے دارالحکومت لاہور میں بینک سے رقم نکلوانے والا شہری گھر کی دہلیز پر لٹ گیا، مزاحمت پر ڈاکوؤں نے فائرنگ کر کے چھوٹے بھائی کو زخمی کردیا۔

تفصیلات کے مطابق لاہور کے جوہر ٹاؤن میں بینک سے رقم نکلوانے والا شہری لٹ گیا، شہری ساجد 35 لاکھ لے کر بینک سے نکلا اور گھر کی دہلیز پر لٹ گیا۔

ڈکیتی کے دوران مزاحمت پر ساجد کا بھائی زخمی بھی ہوا جس کے بعد اسے اسپتال منتقل کردیا گیا۔

سی سی ٹی وی فوٹیج میں دیکھا جاسکتا ہے کہ ساجد والدہ کے ہمراہ گھر پہنچا کہ اسے ڈاکوؤں نے آ لیا، ساجد کا بھائی جو اسی وقت باہر آیا تھا واردات دیکھ کر ڈاکوؤں سے الجھ گیا۔

مزاحمت پر ڈاکوؤں نے فائرنگ کردی جس سے حمزہ زخمی ہوگیا۔

پولیس کا کہنا ہے کہ سی سی ٹی وی فوٹیج کی مدد سے ملزمان کی تلاش جاری ہے۔

خیال رہے کہ لاہور میں جرائم کی شرح میں خطرناک اضافہ ہوچکا ہے، شہر میں ڈکیتی کی وارداتوں میں 282 فیصد جبکہ شاہراؤں پر لوٹ مار کی وارداتوں میں 123 فیصد اضافہ ہوگیا ہے۔

پولیس رپورٹ کے مطابق شہر میں گزشتہ سال کی نسبت ڈکیتی و راہزنی کی وارداتوں میں 405 فیصد اضافہ ہوگیا ہے۔

Comments

یہ بھی پڑھیں