The news is by your side.

Advertisement

کار کے انجن پر خوفناک مخلوق کا قبضہ (ویڈیو دیکھیں)

فلوریڈا: امریکی ریاست فلوریڈا کے ایک ساحلی علاقے میں ایک شہری کی کار کے انجن پر پائتھن سانپ نے قبضہ جما لیا، جسے دیکھ کر شہری خوف زدہ ہو گیا۔

غیر ملکی میڈیا کے مطابق فلوریڈا میں دانیا بیچ پر ایک گاڑی کے انجن پر 10 فٹ لمبے برمیز پائتھن نے قبضہ جما لیا، کار کے مالک نے جب بونٹ اٹھا کر اتنا بڑا سانپ دیکھا تو اس کے اوسان خطا ہو گئے۔

فلوریڈا کے جنگلی حیات کے کمیشن کا کہنا تھا کہ برووارڈ کاؤنٹی کے ایک شہری نے انھیں کال کی تھی کہ اس کی گاڑی کے بونٹ کے اندر بڑا سانپ موجود ہے، وائلڈ لائف اہل کار جب موقع پر پہنچے تو انھوں نے دس فٹ لمبا برمیز پائتھن دیکھا۔

اس سلسلے میں وائلڈ لائف ڈیپارٹمنٹ نے فیس بک پر ایک پوسٹ بھی کی، جس میں واقعے کی ویڈیو بھی شیئر کی گئی ہے، اہل کاروں نے کچھ ہی دیر میں پائتھن کو محفوظ طریقے سے قابو کر کے تھیلے میں بند کر دیا۔

واضح رہے کہ فلوریڈا میں پائتھن کو خطرناک اور ناگوار سمجھا جاتا ہے، کیوں کہ یہ مقامی پرندوں، ممالیہ اور رینگنے والے جانوروں کا کثرت سے شکار کرتے ہیں۔

سوشل میڈیا پوسٹ میں وائلڈ لائف کی جانب سے شہریوں کو شکریہ بھی ادا کیا گیا جنھوں نے سانپ سے متعلق اطلاع دی تھی۔

Comments

یہ بھی پڑھیں