لاڑکانہ: سندھ کے شہر لاڑکانہ میں آوارہ کتوں نے ایک ہی روز میں 22 افراد کو کاٹ لیا۔
اے آر وائی نیوز کی رپورٹ کے مطابق لاڑکانہ ضلع بھر آوارہ کتوں کی بہتات کے اثرات سامنے آنے لگے، ایک ہی روز میں آوارہ کتوں نے 22 افراد کو بھنبھوڑ ڈالا۔
ذرائع کا کہنا کہ کتے کے کاٹنے سے زخمی ہونے والوں میں 10 بچے، 11 مرد اور خاتون شامل ہیں۔
رپورٹ کے مطابق متاثرہ افراد کو چانڈکا اسپتال منتقل کیا گیا، اسپتال کے سینٹر سے ویکسین فراہم کرنے کا دعویٰ کیا گیا ہے۔
مزید پڑھیں: لاڑکانہ کے بعد سکھر میں بھی کتے کے کاٹے سے بچہ زخمی
واضح رہے کہ گزشتہ سال نومبر میں سکھر میں اوباڑو کے گاؤں مزار چاچڑ میں کتے کے کاٹے سے بچہ زخمی ہو گیا تھا، تاہم تحصیل اسپتال میں بچے کو ویکسین نہیں دی جا سکی تھی۔
زخمی ہونے والے بچے کے چچا عابد علی نے اے آر وائی نیوز کے نمایندے کو بتایا تھا کہ بچے کو فوری طور پر تحصیل اسپتال منتقل کر دیا گیا تھا لیکن ایک گھنٹے تک اسپتال میں بچے کو ویکسین نہیں دی گئی۔
بچے کے چچا کا کہنا تھا اسپتال میں ڈاکٹر موجود نہیں تھے، صرف ٹرینر ڈسپنسر موجود تھے، بچے کو تحصیل اسپتال سے رحیم یار خان ریفر کیا گیا ہے، اب ڈاکٹر کہتے ہیں بچے کو زخم گہرا ہے یہاں علاج نہیں ہو سکتا۔
