The news is by your side.

سلمان خان کو قتل کرنے کا مبینہ پلان بی سامنے آگیا

ممبئی: بدنام زمانہ لارینس بشنوئی گینگ کی جانب سے بالی وڈ اسٹار سلمان خان پر دوبارہ حملے کا پلان کہاں ترتیب دیا گیا؟ سنسنی خیز انکشاف سامنے آگیا ہے۔

بھارتی میڈیا رپورٹ کے مطابق معروف پنجابی گلوکار سدھو موسے والا کو قتل کرنے سے پہلے بدنام زمانہ گینگسٹر لارنس بشنوئی نے سپر اسٹار سلمان خان کو مارنے کا پلان بی تیار کیا تھا۔

رپورٹ کے مطابق اس پورے پلان کی ذمہ داری گولڈی برار اور لارنس بشنوئی گینگ کے شوٹر کپل پنڈت کو سونپی گئی تھی، کپل پنڈت کو حال ہی میں بھارت نیپال سرحد کے قریب سے گرفتار کیا جاچکا ہے۔

بھارتی میڈیا رپورٹ کے مطابق کپل پنڈت، سنتوش جادھو اور کچھ دوسرے شوٹر ممبئی کے علاقے میں پنول میں کرائے کے کمرے میں رہنے آئے تھے، کیونکہ سلمان خان کا فارم ہاؤس پنول میں ہی ہے۔

سلمان خان کو مارنے کے لئے شوٹرز نے فارم ہاؤس کے راستے میں ریکی کے لئے ایک کمرہ کرائے پر لیا تھا جس میں انہوں نے ڈیڑھ ماہ قیام کیا، یہ تمام شوٹرز جدید اسلحے سے لیس تھے۔

یہ بھی پڑھیں: سلمان خان پر قاتلانہ حملے کی کوشش کا انکشاف

رپورٹ میں تہلکہ خیز انکشاف کیا گیا کہ شوٹرز  یہ  پتہ لگانے میں کامیاب ہوگئے تھے کہ بالی وڈ اسٹار ‘ہٹ اینڈ رن کیس’ کے بعد سے گاڑی کی رفتار کم رکھتے ہیں۔

اس کے علاوہ بدنام زمانہ لارنس بشنوئی گینگ کے شوٹرز نے یہ بھی پتہ لگالیا تھا کہ سلمان خان جب بھی پنول کے فارم ہاؤس پر آتے ہیں تو ان کے ساتھ صرف ان کا ذاتی گارڈ شیرا موجود ہوتا ہے۔

یاد رہے کہ رواں سال جولائی میں سلمان خان اور ان کے والد سلیم خان کو دھمکی آمیز خط موصول ہوا تھا جس میں لکھا تھا کہ ”آپ کا سدھو موسے والا جیسا حال کر دوں گا“۔ بعد ازاں سلمان خان کو خصوصی طور پر سکیورٹی فراہم کی گئی تھی۔

Comments

یہ بھی پڑھیں