اسلام آباد : تحریک انصاف کے رہنما فواد چوہدری کے وکیل ڈاکٹر بابر اعوان کا کہنا ہےکہ فواد چوہدری اپنے بیان پر ڈٹے ہوئے ہیں، معلوم نہیں کون سا لیپ ٹاپ پراسیکیوشن برآمد کرنا چاہتی ہے۔
تفصیلات کے مطابق تحریک انصاف کے رہنما فواد چوہدری کے وکیل ڈاکٹر بابر اعوان نے سماعت کے بعد میڈیا سے گفتگو کرتے ہوئے کہا کہ ایک شہری کو6 روز لاہور ،اسلام آباد کے بیچ میں گھسیٹے رہے، فوادچوہدری ڈالے میں بٹھانے کا آرڈر تھا۔
وکیل ڈاکٹر بابر اعوان کا کہنا تھا کہ فواد چودھری اپنے بیان پر ڈٹے ہوئے ہیں، پراسیکیوشن معلوم نہیں کس کو خوش کرنا چاہتی ہے، معلوم نہیں کون سا لیپ ٹاپ پراسیکیوشن برآمد کرنا چاہتی ہے۔
عمران خان سے متعلق انھوں نے کہا عمران خان کی کسی سےکوئی لڑائی نہیں ،کسی سے جھگڑانہیں، عمران خان نے کورونا کے دوران بھی ملک چلاکر دکھایا تھا ، اب جتنے بھی تھیڑ لگالیں مہنگائی مزید بڑھے گی۔
پی ٹی آئی رہنما کے وکیل کا کہنا تھا لوگوں کی خواہشیں ، ضرورتیں اور چیخیں بولتی ہیں، عمران خان کی کوئی گرفتاری نہیں ہوگی، جو گرفتاری سے ڈرتا ہے وہ تو لندن میں ہے۔
موجودہ حکومت پر تنقید کرتے ہوئے بابر اعوان نے کہا کہ انہوں نے13زہریلی جڑی بوٹیاں جمع کرکے اقتدارمیں بٹھائی ہوئی ہیں، ایک کیخلاف کچھ ہو تو کہتا ہے گھیراؤ کروں گا، دوسرے کیخلاف کچھ ہو تو کہتا ہے میرے پاس ویڈیوزہیں.
انھوں نے بتایا کہ فواد چوہدری کی درخواست ضمانت پر کل سماعت ہوگی،امید ہے کل فواد چوہدری کی ضمانت منظورہو جائے گی۔
