بیروت (19 نومبر 2025): لبنان میں فلسطینی پناہ گزین کیمپ پر اسرائیلی فضائی حملے میں 13 افراد جاں بحق ہو گئے۔
جنگی جنون میں مبتلا اسرائیل نے جنگ بندی معاہدہ ہوا میں اڑا دیا، جنوبی لبنان میں پھر بم برسا دیے، جس میں فلسطینی پناہ گزین کیمپ میں تیرہ فلسطینی جاں بحق ہو گئے، جب کہ متعدد زخمی بھی ہوئے ہیں۔
لبنانی وزارت نے تصدیق کی ہے کہ صیدون میں ڈرون حملہ منگل کے روز عین الحلوہ پناہ گزین کیمپ میں ایک مسجد کی پارکنگ میں ایک گاڑی کو نشانہ بنا کر کیا گیا۔ اسرائیلی فوج کا کہنا ہے کہ جہاں بھی حماس کام کرے گی، اس کے خلاف کارروائی جاری رکھیں گے۔
اسرائیلی فوج نے حملے کی ویڈیو بھی جاری کر دی ہے، صہیونی فوج کا کہنا ہے کہ جس مقام کو نشانہ بنایا گیا وہاں حماس کے ارکان موجود تھے، جو اسرائیل کے خلاف کارروائیوں کی تیاری کر رہے تھے۔
The Israeli military said it struck a militant training site in Sidon, Lebanon, killing at least 13. Hamas denied the claim and said the strike hit a sports field in a refugee camp https://t.co/ozLQG4kfXt pic.twitter.com/OiOC2OmCZw
— Reuters (@Reuters) November 19, 2025
ایک سال قبل اسرائیل اور حزب اللہ کے درمیان جنگ بندی کے بعد یہ لبنان پر سب سے مہلک حملہ ہے۔ حماس نے ایک بیان میں حملے کی مذمت کرتے ہوئے کہا ہے کہ حملے میں کھیل کے ایک میدان کو نشانہ بنایا گیا اور اس بات کی تردید کی کہ یہ تربیتی کمپاؤنڈ تھا۔
واضح رہے کہ پچھلے دو برسوں کے دوران لبنان پر اسرائیلی فضائی حملوں میں عسکریت پسند حزب اللہ گروپ کے ساتھ ساتھ حماس جیسے فلسطینی دھڑوں کے متعدد اہلکار بھی مارے جا چکے ہیں۔ حماس کے نائب سیاسی سربراہ اور اس گروپ کے عسکری ونگ کے بانی صالح عروری 2 جنوری 2024 کو بیروت کے جنوبی مضافاتی علاقے میں ڈرون حملے میں مارے گئے تھے۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں