نئی دہلی: بھارتی شہری نے کرونا سے بچنے کے لیے لائٹوں والا ماسک تیار کر کے لوگوں کی توجہ حاصل کرلی۔
کرونا سے بچاؤ کے لیے دنیا بھر کے طبی ماہرین نے لوگوں کو ماسک پہننے کی ہدایت کی اور اس کو لازمی بھی قرار دیا ہے۔ اسی بنیاد پر پاکستان سمیت دنیا کے دیگر ممالک نے گھر سے باہر نکلنے والے شہریوں کے لیے ماسک پہننے کو لازمی قرار دیا گیا ہے۔
کرونا وائرس سے محفوظ رکھنے کے لیے عالمی ادارہ صحت نے پبلک ٹرانسپورٹ، دکانوں اور مجمع میں ماسک پہننے کی سختی سے تاکید کی، علاوہ ازیں کلینکوں میں کام کرنے والا عملے اور 60 برس سے زائد عمر کے افراد اور بیمار افراد کو میڈیکل ماسک پہننے کی ہدایت بھی کی۔
شہریوں کو ترغیب دینے کے لیے نت نئے ماسک تیار کیے جارہے ہیں۔ اس سے قبل بھارتی شہری نے ہیروں سے مزین ماسک تیار کر کے دنیا کو حیران کردیا تھا۔
اب ایک اور بھارتی شہری نے ایل ای ڈی لائٹ کا استعمال کرتے ہوئے شاندار ماسک تیار کیا ہے جسے دیکھ کر شہری حیران رہ گئے۔
سماجی رابطے کی ویب سائٹ فیس بک پر بیوس داس نے ایل ای ڈی ماسک کی ویڈیو شیئر کی جسے لوگوں نے پسند کیا۔
