اسلام آباد : ماہرقانون ابوذرسلمان نیازی کا کہنا ہے کہ ارشد شریف قتل کے تحقیقاتی کمیشن سے ایسا لگ رہا ہے حکومت کیس حل نہیں کرنا چاہتی۔
تفصیلات کے مطابق ماہرقانون ابوذرسلمان نیازی نے اے آر وائی نیوز کے پروگرام ‘سوال یہ ہے’ میں ارشد شریف قتل کیس کے حوالے سے کہا کہ ارشدشریف پر بنائے گئے تحقیقات کمیشن پر اعتماد نہیں کیا جا سکتا۔
ابوذرسلمان نیازی کا کہنا تھا کہ ریٹائرڈ جج کو کمیشن کا سربراہ بنا دیا گیا جو ٹیکس سے متعلق کیسز دیکھتا رہا ہے اور ریٹائرڈ جج کیساتھ بھی 2 حکومتی افسران کو لگا دیا گیا ہے، ایسے تحقیقاتی کمیشن پر کون اعتماد کرے گا۔
ماہر قانون نے کہا کہ حکومت سنجیدہ ہوتی تو خود ہی اقوام متحدہ کو تحقیقات کا کہہ دیتی، بے نظیر بھٹو قتل کیس میں حکومت نے ہی اقوام متحدہ کو کہا تھا۔
ان کا مزید کہنا تھا کہ اقوام متحدہ خود بھی ازخود نوٹس لے کرتحقیقات کراسکتی ہے، اقوام متحدہ نے جمال خشوگی کیس میں خود ہی نوٹس لیا تھا۔
ابوذرسلمان نیازی نے کہا کہ موجودہ تحقیقاتی کمیشن سے حکومت کی غیر سنجیدگی واضح ہے، ایسا لگ رہا ہے حکومت ارشد شریف کیس حل نہیں کرنا چاہتی۔
ماہر قانون کا کہنا تھا کہ اقوام متحدہ کی ٹیم کینیا جا کر بہتر تفتیش کرسکتی ہے، پاکستان سے جانے والی ٹیم کیسے تفتیش کرے گی ، کینیا پولیس تو جرم چھپائے گی۔
