لندن: برطانیہ کے شہر لیسسٹر میں ایک تیز رفتار کار نے نمازیوں کو کچل دیا جس کے نتیجے میں 2 افراد شدید زخمی ہوگئے۔
غیرملکی خبررساں ادارے کے مطابق برطانیہ کے شہر لیسسٹر میں گزشتہ روز ایک تیز رفتار کار نے مسجد سے نماز پڑھ کر نکلنے والے نمازیوں کو کچل دیا جس کے نتیجے میں ایک 40 سالہ شخص اور نوعمر بچہ زخمی ہوگیا۔
حادثے میں زخمی شخص کو اور نوعمر بچے کو فوری طور پر اسپتال منتقل کیا گیا جہاں 40 سالہ شخص کی حالت نازک بتائی جارہی ہے جبکہ بچے کو معمولی چوٹیں آئی ہیں۔
حادثہ رات کو ایک بجکر 15 منٹ پر پیش آیا، پولیس نے ڈرائیور کا پتا لگانے کے لیے عینی شاہدین سے تعاون کی اپیل کی ہے۔
مزید پڑھیں: برطانیہ: کار سوار نے عوام پر گاڑی چڑھادی، چار افراد زخمی
عینی شاہد خاتون کا کہنا ہے کہ میں عید کے تحائف خریدنے کے لیے گاڑی سے اتری تھی جب ہم کراسنگ کے قریب پہنچے تو ہمیں کار تیزی سے آتی دکھائی دی، میری بہن نے کہا کار تیزی سے آرہی ہے میں نے اس کا ہاتھ مضبوطی سے پکڑ لیا۔
خاتون نے کہا کہ ہم نے دوڑنا شروع کردیا اور جب کار قریب آئی تو اس نے اپنا اسٹیرنگ ہماری جانب موڑ دیا، میں نے اپنی بہن کا ہاتھ پکڑ کر اسے پیچھے کی جانب دھکیل دیا، میں خود بھی پیچھے ہٹ گئی اور کار بالکل ہمارے قریب سے گزر کر دوسرے لوگوں کو روندتے ہوئے گزر گئی۔
پولیس کا کہنا ہے کہ واقعے کا دہشت گردی سے کوئی تعلق نہیں ہے یہ ایک حادثہ ہے جس کی تحقیقات جاری ہیں۔
