لاہور : لاہور ہائی کورٹ نے عید تک بیکریوں کو رات ایک بجے تک کام کرنے کی اجازت دے دی اور غیر قانونی پارکنگ فوری سیل کرنے کے حکم دے دیا۔
تفصیلات کے مطابق لاہورہائیکورٹ میں اسموگ کے تدارک کےلیےدائردرخواست پر سماعت ہوئی ، جسٹس شاہدکریم نے ہارون فاروق سمیت دیگرکی درخواستوں پر سماعت کی۔
عدالت نے عید تک بیکریوں کو رات ایک بجے تک کام کرنے کی اجازت دیتے ہوئے نجی مال کے اردگرد غیر قانونی پارکنگ فوری سیل کرنے کے حکم دے دیا۔
دوران سماعت عدالت نے شہر میں جگہ جگہ انڈر پاسز بنانے پر برہمی کا اظہار کرتے ہوئے کہا جہاں دل کرتا ہے انڈر پاس بنا دیتے ہیں ، انڈر پاس بنانے کے بجائے سڑکوں کی ری ماڈلنگ ہوجائے تو مسائل حل ہوجائیں۔
جسٹس شاہد کریم نے ریمارکس دیئے ٹریفک پولیس کو تو لوگ کچھ سمجھتے ہی نہیں ہیں، ٹریفک پولیس کو مزید امپاور کرنے کی ضرورت ہے، دبئی میں کوئی ٹریفک والا کسی کو روک لےتوجرأت نہیں ہوتی کوئی بات کرجائے۔
بعد ازاں عدالت نے مزید کارروائی آئندہ ہفتے تک ملتوی کردی۔
عابد خان اے آروائی نیوز سے وابستہ صحافی ہیں اور عدالتوں سے متعلق رپورٹنگ میں مہارت کے حامل ہیں