لاہور : لاہور ہائی کورٹ نے پیٹرولیم مصنوعات کی قیمتوں میں اضافے کےخلاف درخواست پر اوگرااور پیٹرولیم منسٹری کو نوٹس جاری کرتے ہوئے جواب طلب کرلیا۔
تفصیلات کے مطابق لاہور ہائی کورٹ میں پٹرولیم مصنوعات کی قیمتوں میں اضافے کے خلاف متفرق درخواست پر سماعت ہوئی۔
جسٹس شاہد کریم نے جوڈیشل ایکٹوزم پینل کی متفرق درخواست پر سماعت کی ، درخواست گزار نے موقف اختیار کیا کہ بین الاقوامی مارکیٹ میں پٹرولیم مصنوعات کی قیمتوں میں کمی ہوئی ہے جبکہ حکومت نے پیٹرولیم مصنوعات کی قیمتوں میں اضافہ کیا ہے۔
درخواست گزار کا مزید کہنا تھا کہ پٹرولیم مصنوعات کی قیمتوں میں اضافے سے قبل کابینہ سے منظوری بھی نہیں لی گئی۔
درخواست میں کہا گیا کہ قیمتوں میں اضافے کے لیے ٹھوس وجوہات بھی بیان نہیں کی گئی لہذا عدالت پٹرولیم مصنوعات کی قیمتوں میں اضافے کو کالعدم قرار دے۔
عدالت نے کہا کس طرح پیٹرول کی قیمتوں میں اضافہ ہو سکتا ہے، پوری دنیا میں فی بیرل پیٹرول سستا ہو رہا ہے۔
عدالت نے استفسار کیا پاکستان میں پیٹرول کی قیمتیں کیوں بڑھا رہےہیں؟ ڈپٹی اٹارنی جنرل سے پیٹرولیم کی قیمت وضع کرنے کے طریقہ کار پر استفسار کرتے ہوئے کہا پیٹرول کی قیمتیں بڑھانے کا کیا طریقہ کار ہے؟
عدالت نے درخواست پر وفاقی حکومت، وزارت پٹرولیم اور اوگرا کو نوٹس جاری کرتے ہوئے اگلے ہفتے جواب طلب کر لیا۔
عدالت نے سرکاری وکیل کو ہدایت کی کہ اگلی سماعت پر پٹرولیم مصنوعات کی قیمتوں میں اضافہ کے بارے طریقہ کار پیش کریں۔
