The news is by your side.

Advertisement

لاہور ہائی کورٹ نے منشا بم کی 90 دنوں کیلئے نظر بندی کا نوٹیفکیشن معطل کر دیا

لاہور : لاہور ہائی کورٹ نے منشا بم کی 90 دنوں کیلئے نظر بندی کا نوٹیفکیشن معطل کر دیا ، ڈی سی لاہور کی جانب سے منشا بم کی نظر بندی کا نوٹیفکیشن جاری کیا گیا تھا۔

تفصیلات کے مطابق لاہور ہائی کورٹ کے جسٹس اسجد جاوید گھرال نے منشا بم کی درخواست پر سماعت کی، منشا بم کے وکیل فرہاد علی شاہ نےعدالت کو بتایا کہ ڈی سی لاہور نے نقص امن کے الزام میں منشا بم کو نظر بند کرنے کا نوٹیفکیشن جاری کیا، نظر بندی کے احکامات جاری کرنے سے پہلے منشا بم کا موقف سنا نہیں گیا۔

وکیل فرہاد علی شاہ کا کہنا تھا کہ درخواست گزار کسی بھی غیر قانونی سرگرمی میں ملوث نہیں،استدعا ہے کہ منشا بم کی 90 دنوں کیلئے نظر بندی کا حکم غیر قانونی قرار دے کر کالعدم کیا جائے۔

جس کے بعد عدالت نے ڈی سی لاہور کی جانب سے منشا بم کی 90 دنوں کیلئے نظر بندی کا نوٹیفکیشن معطل کر دیا ۔

یاد رہے نومبر 2020 میں لاہور پولیس نے دہشت کی علامت سمجھے جانے والے قبضہ مافیا منشا بم کے 4 بیٹوں عامر منشا، عاصم منشا، طارق منشا اور فیصل منشا کو گرفتار کرلیا تھا جبکہ منشا بم فرار ہوگیا تھا۔

ایس پی صدر نے بتایا تھا کہ چاروں ملزمان حوالات میں بند ہیں اور مقدمات درج کرلئے گئے ہیں، ملزمان کے قبضے سے جدیداسلحہ، آٹو میٹک گنز اور پستول برآمد کرلی گئی ، قبضہ مافیامنشابم پر بھتہ، قتل سمیت سنگین جرائم کے 77 مقدمات درج ہیں، منشابم کے بیٹے مقدمات درج ہونے کے باوجود گرفتار نہ ہوسکے تھے۔

ایس پی صدر کا کہنا تھا کہ ملزمان کےخلاف شہریوں کودھمکانے کی شکایات موصول ہورہی تھیں، سی سی پی اولاہورعمرشیخ کی ہدایت پرقبضہ گروپوں کے خلاف کارروائی کی گئی۔

Comments

یہ بھی پڑھیں