لاہور : لاہور ہائی کورٹ نے غلط جگہ گاڑیاں پارک کرنے پر 5 ہزار روپے جرمانہ کرنے کا حکم دے دیا جبکہ گھروں میں گاڑیاں دھونے والوں پر بھی جرمانہ ہوگا۔
تفصیلات کے مطابق لاہور ہائی کورٹ میں اسموگ کے تدارک کےلئے درخواستوں پر سماعت ہوئی، عدالت نے شہر میں غلط جگہ گاڑیاں پارک کرنے پر 5 ہزار روپے جرمانہ کرنے کا حکم دے دیا۔
عدالت نے گھروں میں گاڑیاں دھونے والوں کو 3 ہزار روپے جرمانہ کرنے کا حکم دیتے ہوئے کہا کہ یہ جرمانہ واسا کے خزانے میں جائے گا، ملک میں پانی کا ایشو انتہائی سنجیدہ ہوتا جارہا ہے۔
جوڈیشل واٹرکمیشن نے استدعا کی کہ ہیلمٹ نہ پہننےوالوں کو 2ہزار روپے جرمانہ بڑھانے کا حکم دیا جائے۔
عدالت کا شہر میں ترقیاتی منصوبے شروع کرنے پر ایل ڈی اے پر اظہار ناراضی کرتے ہوئے کہا کہ اسموگ کا سیزن شروع ہوچکا ہے اس کے لیے چھ ماہ پہلے تیاری کرنی پڑتی ہے۔
نگران حکومت کوترقیاتی منصوبےشروع کرنے میں پتہ نہیں اتنی کیا جلدی ہے، منصوبے 4ماہ روک نہیں سکتے تھے۔
