سکھوں کا مذہبی مقام کرتار پور پاک و ہند کی تقسیم سے قبل بچھڑنے والے خاندان کو ملانے کا سبب بننے لگا۔
تفصیلات کے مطابق کرتار پور میں چوہتر سال قبل بچھڑنے والے دو خاندانوں کی ملاقات ہوئی، تقسیم پاک و ہند سے قبل دونوں خاندان منقسم ہوگئے تھے، کرتارپور میں ملنے پر دونوں خاندان کے افراد آپس میں بغل گیر ہوکر ایسے ملے کہ وہاں موجود دیگر سیاح بھی اپنے آنسو نہ روک سکے اور فرط جذبات سے رو دئیے۔
تاریخی اور جذباتی مناظر کو کیمروں نے اپنی آنکھوں میں محفوظ کیا اور سوشل میڈیا کی زینت بنایا۔
بھارتی ضلع امرتسر کےگاؤں شاہ پور ڈوگراں کے خاندان نے ننکانہ صاحب کے رہائشی شاہد رفیق سےملاقات کی، شاہد رفیق نے بتایا کہ ہمارےخاندان دو ملکوں میں آباد تھے، دو سال قبل سوشل میڈیا کےذریعے ہماری اپنےبڑوں سے ملاقات ہوئی، آج اپنی دادی اور کزن سے ملاقات نے دلی خواہش پوری کردی۔
سکھوں کے مذہبی مقام پر ہونے والی تاریخی ملاقات پر دونوں خاندانوں نے یادگار بھی تصاویر بنوائیں۔
بچھڑے خاندانوں کے ملنے پر کرتارپور انتظامیہ نے خوشی کے موقع پر مٹھائی تقسیم کی، اس موقع پر بچھڑے ہوئے خاندان نے کرتارپور گردوارہ کے مختلف حصوں کا دورہ بھی کیا۔
اس سے قبل رواں سال دس جنوری کو کرتارپور راہداری پر بھارتی شہری سکہ خان کی پاکستان میں موجود اپنے بھائی سے 74 سال بعد پہلی مرتبہ ملاقات ہوئی تھی۔
بھائی سے ملاقات کے بعد سکہ خان نے میڈیا سے گفتگو میں کہا تھا کہ ’یہ ہمارے لیے ایک جذباتی لمحہ تھا اور مجھے یقین نہیں آ رہا تھا کہ میں اپنے بھائی اور اس کے خاندان سے مل رہا ہوں۔
