کراچی: صوبہ سندھ کے دارالحکومت کراچی میں کے الیکٹرک نے صنعتی علاقوں میں لوڈ شیڈنگ کا شیڈول جاری کردیا۔ تمام صنعتی علاقوں میں رات 12 سے صبح 7 بجے تک بجلی بند رہے گی۔
تفصیلات کے مطابق کے الیکٹرک نے کراچی کے صنعتی علاقوں میں لوڈ شیڈنگ کا شیڈول جاری کردیا۔
شیڈول کے مطابق کراچی کے تمام صنعتی علاقوں میں رات 12 سے صبح 7بجے تک بجلی بند رہے گی۔
دوسری جانب نارتھ کراچی انڈسٹریل ایسوسی ایشن کے ترجمان کا کہنا ہے کہ شیڈول کے علاوہ بھی دن میں 3 سے 4 گھنٹے بجلی بند رہنے کا سلسلہ جاری ہے۔ بجلی کی بندش سے نارتھ کراچی میں بیشتر فیکٹریاں بند ہوگئی ہیں۔
مزید پڑھیں: کراچی سمیت سندھ کے کئی شہروں میں بجلی کا طویل بریک ڈاؤن
ادھر کورنگی ایسوسی ایشن آف ٹریڈ اینڈ انڈسٹری نے بجلی کے بریک ڈاؤن پر تحقیقاتی کمیٹی بنانے کا مطالبہ کردیا۔
کاٹی کے چیئرمین مسعود نقی کا کہنا ہے کہ کے الیکٹرک کی وجہ سے کورنگی میں صنعتیں بند ہوگئی ہیں۔
واضح رہے کہ حکومت کی ہدایات کے باوجود کراچی سمیت سندھ کے مختلف علاقوں میں بجلی کے بریک ڈاؤنز کا سلسلہ جاری ہے اور کراچی کے لوگ آغاز رمضان سے ہی اندھیرے میں سحر و افطار کرنے پر مجبور ہیں۔
