اسلام آباد: الیکشن کمیشن آف پاکستان نے وفاقی دارالحکومت میں بلدیاتی الیکشن کا شیڈول جاری کردیا ہے۔
ترجمان الیکشن کمیشن کے مطابق وفاقی دارالحکومت اسلام آباد میں بلدیاتی انتخابات اکتیس جولائی کو ہونگے، بلدیاتی الیکشن میں حصہ لینے والے امیدوار اپنے کاغذات نامزدگی تیرہ سے سولہ جون تک جمع کراسکتے ہیں۔
الیکشن کمیشن کے مطابق کاغذات نامزدگی کی جانچ پڑتال بیس سے بائیس جون تک کی جائے گی، الیکشن شیڈول کے اعلان کے بعد اسلام آباد میں تقرری اور تبادلوں پر پابندی عائد کردی گئی ہے، جس کا نوٹیفکیشن بھی جاری کردیا گیا ہے۔
یہ بھی پڑھیں: سندھ میں بلدیاتی الیکشن، ترقیاتی منصوبوں کے اعلان پر پابندی
نوٹی فیکیشن کے مطابق بلدیاتی انتخابات کے انعقاد تک اسلام آباد میں نئے ترقیاتی منصوبوں اور اسکیموں کے اعلان پر پابندی ہو گی۔
اس سے قبل مئی میں ہونے والے سماعت کے موقع پر اسلام آباد ہائیکورٹ نے وفاقی دارالحکومت اسلام آباد میں بلدیاتی انتخابات کا انعقاد روکنے کا حکم دیا تھا۔
عدالت میں وفاقی کابینہ کی سمری پیش کی گئی تھی جس میں کہا گیا تھا کہ وفاقی حکومت نے اسلام آباد کی 101 یونین کونسلز بنانے کا فیصلہ کیا ہے،سمری میں کہا گیا کہ نئی بلدیاتی حلقہ بندیوں کے لیے فوری طور پر الیکشن کمیشن سے رجوع کیا جائے۔
