The news is by your side.

Advertisement

پنجاب میں رات 12 بجے لاک ڈاون کا خاتمہ، نوٹیفکیشن جاری

لاہور : حکومت پنجاب نے آج رات 12 بجے سے کرونا لاک ڈاون ختم کرنے کا نوٹیفکیشن جاری کردیا۔

تفصیلات کے مطابق دنیا بھر کی طرح پاکستان میں بھی کرونا وائرس کا پھیلاو روکنے کےلیے گزشتہ کئی ماہ سے لاک ڈاون جاری ہے تاہم پنجاب حکومت نے صوبے بھر میں لاک ڈاون ختم 5 اگست کے بجائے 3 اگست سے ہی ختم کرنے کا اعلان کردیا ہے۔

حکومت پنجاب کی جانب سے لاک ڈاون ختم کرنے کا نوٹیفکیشن بھی جاری کردیا گیا ہے، جس کا اطلاق آج رات 12 بجے سے ہوگا۔

نمائندہ اے آر وائی کا کہنا ہے کہ پنجاب میں مکمل لاک ڈاون ختم کرکے اسمارٹ لاک ڈاون کا نفاذ کردیا جائے گا۔

سیکریٹری پرائمری ہیلتھ کا کہنا تھا کہ متعلقہ ادارے تمام ایس او پیز پر عملدر آمد یقینی بنائیں گے، تمام کاروباری مقامات صبح 9 سے شام 7 بجے تک، پیر تا جمعہ کھلے رہیں گے۔

نوٹیفکیشن کے مطابق 5 اگست کو کشمیریوں سے اظہار یکجہتی کیلئے اجتماع کی اجازت ہوگی جبکہ میڈیکل اسٹور، پنکچر شاپ، آٹا، چکی تندور، زرعی ورکشاپس 24 گھنٹے کھلی رکھنے کی بھی اجازت ہوگی۔

سیکریٹری ہیلتھ کیئر نے نوٹیفکیشن میں کہا کہ تعلیمی ادارے، شادی ہال، ریسٹورنٹ، پارک،سینما بدستور بند رہیں گے تاہم کال سنٹرز کو 50 فیصد اسٹاف کیساتھ کھلا رکھنے کی اجازت ہوگی۔

سیکریٹری ہیلتھ کیئر نے کہا کہ بین الاضلاع ٹرانسپورٹ کو 24 گھنٹے چلنے کی اجازت ہوگی اور گروسری و کریانہ اسٹور صبح 9 سے شام 7 تک، ہفتہ بھر کھلے رہیں گے جبکہ چرچ صرف اتوار کو صبح 7 سے شام 5 بجے تک عبادت کیلئے کھلے رہیں گے۔

نوٹیفکیشن میں کہا گیا ہے کہ سماجی و مذہبی اجتماعات، کھیل کی سرگرمیوں کیلئے جمع ہونے کی اجازت نہیں ہوگی۔

سیکریٹری ہیلتھ کئیر کا مزید کہنا تھا کہ نوٹیفکیشن کا اطلاق فی الفور ہوگا، 17 اگست تک نافذ العمل رہے گا۔

ذرائع کے مطابق حکومت پنجاب نے مویشی منڈیوں سے لیے گئے سیمپلز کے حوصلہ افزا نتائج آنے کے بعد لاک ڈاؤن کے خاتمے کا فیصلہ کیا ہے، مویشی منڈیوں میں کرونا وائرس نہ ہونے پر صوبائی حکومت نے تین اگست کو لاک ڈاؤن ختم کرنے کا فیصلہ کیا، علاوہ ازیں عید پر مارکیٹوں کی بندش کے بعد کرونا وائرس کے پھیلاو کے امکانات کم ہوئے جس کی بنیاد پر لاک ڈاؤن کے خاتمے کا فیصلہ کیا گیا۔

پنجاب حکومت کا کل سے اسمارٹ‌ لاک ڈاؤن ختم کرنے کا فیصلہ

یاد رہے کہ پنجاب حکومت نے عیدالاضحیٰ کی مناسبت سے صوبے بھر میں اچانک اسمارٹ لاک ڈاؤن نافذ کیا تھا، جس کے تحت مویشی منڈیوں کو شہر کی حدود سے باہر لگانے کی اجازت دی گئی تھی جبکہ صوبے کے تمام بازار، مارکیٹس اور پلازوں کو عید سے تین روز قبل بند کردیا گیا تھا۔

پنجاب میں ہونے والے اسمارٹ لاک ڈاؤن کے بعد کرونا کیسز میں نمایاں کمی دیکھنے میں آئی۔ صوبائی وزیر صحت نے تصدیق کی تھی کہ 19 اضلاع میں ایک بھی کیس رپورٹ نہیں ہوا جس کے بعد اُن علاقوں کو کرونا فری قرار دے دیا گیا ہے۔

Comments

یہ بھی پڑھیں