لندن: فیشن ویک میں حسین ماڈلز کی دیدہ زیب ملبوسات کے ساتھ ریمپ پر واک نے حاضرین کے دل موہ لیے۔
لندن فیشن ویک اپنی تمام تررنگینیوں کے ساتھ جاری ہے،اس رنگا رنگ فیشن ویک میں مختلف ممالک کے 80 سے زائد فیشن ڈیزائنر موسم خزاں اور سرما ں کے حوالے سے اپنے نت نئے ملبوسات کی نمائش کررہے ہیں۔
شمالی کوریا سے تعلق رکھنے والے جے ایس لی کے ڈیزائن کردہ ملبوسات کو پہلے روز نمائش کے لیے پیش کیا گیا۔ میڈیا سے بات چیت کرتے ہوئے جے ایس لی کا کہنا تھا کہ انہوں نے ملبوسات کو ڈیزائن کرتے وقت وکٹوریا دورکے سٹائل کو مدنظر رکھا ہے۔
دوسری جانب برٹش فیشن کونسل کی چیف ایگزیکٹو کیرولائن نے میڈیا سے گفتگو کرتے ہوئے کہا کہ لندن فیشن ویک میں پیش کیے جانے والے ملبوسات کو ڈیزائنر نے دنیا بھر کے کلائنٹس کی ضروریات کو مدنظر رکھتے ہوئے تیار کیا ہے۔ جن لگژری برانڈز کی پراڈکٹس اس فیشن شو میں پیش کی جائینگی ان کی فروخت میں تیزی سے اضافہ متوقع ہے۔
معروف فیشن ڈیزائنرز کے دلکش اور رنگین لباس زیب تن کیے ماڈلز ریمپ پر جلوے بکھیر رہی ہیں۔حسین ماڈلز کا یہ میلہ بائیس فروری تک جاری رہے گا۔