لندن: ہائیڈ پارک میں واٹر فائٹ کے دوران ہجوم کے ایک گروہ نے پولیس پر حملے کردیا، جس کے نتیجے میں دو پولیس اہلکاروں سمیت چارافراد زخمی ہوگئے جبکہ پارک کوسیل کردیا گیا ہے۔
برطانوی میڈیا کے مطابق ہائیڈ پارک میں ایک دوسرے پر پانی پھینکنے کا مقابلہ جاری تھا کہ اس دوران ہجوم کے ایک گروہ نے پولیس پر بوتلوں سے حملہ کردیا، حملے میں دو پولیس اہلکار زخمی ہوگئے۔
پولیس کا کہنا ہے کہ ایک اہلکار کو چاقو کے وار سے زخمی کیا گیا ہے جبکہ ایک اہلکار کو سر میں چوٹ آئی ہے، دونوں اہلکاروں کو اسپتال منتقل کر دیا گیا ہے اور دونوں کی حالت خطرے سے باہر ہے۔
پولیس کا کہنا ہے کہ دو دیگر افراد کے بھی چاقو کے وار سے زخمی ہونے کی اطلاع ملی ہے، جنہیں اسپتال منتقل کردیا گیا ہے، میٹ پولیس ترجمان کا کہنا ہے کہ پولیس ہائیڈپارک میں جائے وقوعہ پر موجود ہے اور واقعے کی تحقیقات کی جارہی ہے۔