لندن: میئر لندن صادق خان نے امریکی صدر ڈونلڈ ٹرمپ کو 20 ویں صدی کا فاشسٹ قرار دے دیا۔
غیرملکی خبررساں ادارے کے مطابق امریکی صدر کے ریلیوں میں دئیے گئے بیانات کے حوالے سے ان کا کہنا تھا کہ ڈونلڈ ٹرمپ دنیا کے لیے سب سے بڑا خطرہ ہیں، ان کے خیالات آزادی، اور مذہبی آزادی کی امریکی اقدار کے خلاف ہیں۔
صادق خان کا کہنا تھا کہ دنیا بھر میں دائیں بازو کی جماعتیں اٹھ رہی ہیں جو 70 سالہ حقوق کے لیے کی گئی ہماری جدوجہد، آزادی اور لبرل جمہوری اقدار کے لیے ایک سنگین خطرہ ہیں۔
برطانوی اخبار میں لکھے گئے آرٹیکل میں ان کا کہنا تھا کہ امریکی صدر کے تین روزہ دورے کے موقع پر ٹرمپ کے لیے ریڈ کارپٹ استقبال برطانوی روایت کے خلاف ہے۔
مزید پڑھیں: برطانیہ بغیر ڈیل کے ہی یورپی یونین سے نکل جائے، ٹرمپ
واضح رہے کہ 2016 میں لندن کی میئر شپ کا عہدہ سنبھالنے کے بعد سے صادق خان اور امریکی صدر ڈونلڈ ٹرمپ کے مابین تلخ جملوں کا تبادلہ ہوتا رہتا ہے۔
یاد رہے کہ امریکی صدر ڈونلڈ ٹرمپ کل برطانیہ پہنچیں گے جہاں وہ ملکہ برطاںیہ سمیت دیگر اہم شخصیات سے ملاقاتیں کریں گے۔
