امریکا میں دو سگی بہنوں کی زندگی میں پہلی بار ملاقات ہوئی، دونوں بہنیں اب 70 برس سے زائد عمر کی ہوچکی ہیں۔
غیرملکی خبررساں ادارے کی رپورٹ کے مطابق امریکی ریاست کولوراڈو کے صدر مقام ڈینور کے انٹرنیشنل ہوائی اڈے پر 76 سالہ ہیریٹ کارٹر اور 73 سالہ لِنڈا ہوفمین کی ملاقات ہوئی، بہنوں کو ایک دوسرے کا علم ایک ویب سائٹ کے ذریعے ہوا۔
بڑی بہن ہیریٹ کو ان کی پیدائش کے بعد والدین نے انہیں کسی اور خاندان کو گود دے دیا تھا جبکہ چھوٹی بہن کا کنا ہے کہ اسے تو ساری زندگی والدین نے یہ بات ہی نہیں بتائی کہ اس کی ایک بڑی بہن بھی ہے۔
دونوں بہنوں نے حال ہی میں ایک ویب سائٹ کے طریقہ کار پر دستخط کیے جس کے بعد ان کے ڈی این اے ٹیسٹ ہوئے جو کہ 100 فیصد میچ کرگئے۔
چھوٹی بہن کا کہنا ہے کہ انہیں ہیریٹ کا ایک پیغام موصول ہوا تھا جس میں کہا گیا تھا کہ ان کے خیال کے مطابق ہم دونوں کا آپس میں تعلق ہے۔
دونوں کا کہنا ہے کہ انہیں گزرے ہوئے 70 برس کے کھو جانے کا دکھ نہیں بلکہ اب جو وقت باقی بچا ہے وہ ہم ساتھ گزاریں گے۔