اسلام آباد : پاکستان تحریک انصاف کے زیراہتمام گزشتہ روز نکالے جانے والے حقیقی آزادی مارچ میں عوام کا جوش وخروش قابل دید تھا۔
آزادی مارچ کے شرکاء مختلف علاقوں سے تمام تر رکاوٹوں کے باوجود اسلام آباد پہنچنے میں کامیاب ہوئے، پی ٹی آئی کارکنان نے اپنی مدد آپ کے تحت تمام رکاٹیں صاف کیں۔
عمران خان کی زیر قیادت آنے والے قافلے کے استقبال کیلئے ہزاروں لوگ مختلف شاہراہوں پر پہلے سے موجود تھے اور امپورٹڈ حکومت نامنظور اور جلد انتخابات کے حق میں نعرے لگا رہے تھے۔
اس موقع پر مختلف ٹی وی چینلز کی جانب سے براہ راست نشریات کا عمل بھی جاری تھا اور لوگ ٹی وی چینلز پر اپنے خیالات کا اظہار بھی کررہے تھے۔
ایسے میں اے آر وائی نیوز سب پر بازی لے گیا، مارچ کے پرجوش شرکاء نے چینل کا کیمرہ دیکھ کر اے آر وائی زندہ باد کے زور دار نعرے لگائے۔
ایک موقع پر اے آر وائی نیوز کے نمائندے الفت مغل چینل کو تازہ صورتحال سے متعلق بیپر دے رہے تھے کہ اس دوران انہوں نے وہاں موجود کارکنان سے بھی بات کی۔
انہوں نے ایک کارکن سے سوال پوچھا ہی تھا کہ پی ٹی آئی کارکن نے فرط جذبات سے اے آر وائی نیوز کے مائیک کو چوم لیا جس پر وہاں موجود لوگوں نے بھی خوشی کا اظہار کیا۔
واضح رہے کہ چیئرمین پی ٹی آئی عمران خان اپنی مختلف تقاریر میں اے آر وائی نیوز کی رپورٹنگ اور ریکارڈنگ کے حوالے سے اس کی تعریف کرتے رہے ہیں۔
