پاکستان تحریک انصاف کے لانگ مارچ کے پیش نظر لاہور اور اسلام آباد میں راستوں کی بندش کے نتیجے میں فضائی آپریشن متاثر ہونے کا خدشہ پیدا ہوگیا۔
اس حوالے سے ترجمان پی آئی اے کا کہنا ہے کہ پی آئی اے کی پروازیں معمول کے مطابق شیڈول ہیں تاہم راستوں کی بندش کے باعث ناگزیر وجوہات کی وجہ سے تاخیر ہوسکتی ہے۔
ترجمان پی آئی اے کے مطابق تمام مسافروں سے گزارش ہے کہ وہ وقت کا دورانیہ پیش نظر رکھتے ہوئے ائیرپورٹ کیلئے گھروں سے روانہ ہوں۔
انہوں نے کہا کہ پی آئی اے کی پروازوں سے متعلق پی آئی اے کال سینٹر 111 786 786 سے رابطہ بھی برقرار رکھیں۔
واضح رہے کہ اسلام آباد سمیت لاہور میں بھی پی ٹی آئی کے لانگ مارچ کو روکنے کے لئے حکومت کی جانب سے سخت ترین انتظامات کیے گئے ہیں۔
پاکستان تحریک انصاف کی جانب سے آج لانگ مارچ کا اعلان کیا گیا ہے جسے روکنے کیلئے حکومت نے اسلام آباد جانے والے راستے بند کر رکھے ہیں۔
لاہور میں پی ٹی آئی کے کارکن اسلام آباد جانے کیلئے بتی چوک پہنچے جہاں پولیس نے رکاوٹیں کھڑی کر رہی تھیں، کارکنوں کی جانب سے طاقت کا استعمال کیا گیا اور پولیس کی کھڑی کی گئی رکاوٹیں ہٹا دی گئیں۔
