لندن: لارڈز کرکٹ اسٹیڈیم نے پاکستانی اسٹار کرکٹر شاہد خان آفریدی کو خراج تحسین پیش کرنے کےلیے خصوصی ویڈیو جاری کی ہے جس میں اُن کی 2009 ورلڈ کپ کی پرفارمنس دکھائی گئی ہے۔
سماجی رابطے کی ویب سائٹ ٹوئٹر پر لارڈز گراؤنڈ کی جانب سے جاری کردہ ویڈیو میں شاہد خان آفریدی کی 2009 کے ورلڈ کپ میں کھیلی جانے والی شاندار اننگز کو دکھایا ہے۔
ہوم آف گراؤنڈ (لارڈز اسٹیڈیم) کی آفیشل آئی ڈی سے جاری اس ویڈیو کے بعد بین الاقوامی کرکٹر بھی ویڈیو پر تاثرات دے رہے ہیں جبکہ لالا کے مداح بھی مستقبل میں ان کی کمی کا شکوہ کرتے نظر آرہے ہیں۔
A fond farewell to international cricket to @SAfridiOfficial.
Worth watching his 2009 World T20 winning performance again! #LoveLords pic.twitter.com/tJVN6OI0WO
— Lord’s Ground (@HomeOfCricket) February 21, 2017
یاد رہے شاہد آفریدی نے گزشتہ اتوار شارجہ اسٹیڈیم میں شاندار بیٹنگ کا مظاہرہ کرنے کے بعد پریس کانفرنس کے ذریعے انٹرنیشنل کرکٹ سے ریٹائرمنٹ کا باضابطہ اعلان کرتے ہوئے کہا تھا کہ اب وہ صرف مداحوں کے لیے کرکٹ کھیل رہے ہیں اُن کا مقصد ٹیم میں جگہ بنانا نہیں ہے۔
واضح رہے شاہد آفریدی کو 1996 میں بوم بوم کا لقب دیا گیا تھا جب انہوں نے سری لنکا کے خلاف کھیلے جانے والے میچ میں 37 گیندوں کا سامنا کرتے ہوئے انٹرنیشنل کرکٹ کی پہلی تیز ترین سینچری بنانے کا اعزاز اپنے نام کیا تھا۔
علاوہ ازیں شاہد خان آفریدی نے کرکٹ کی دنیا میں صرف بیٹنگ ہی نہیں بلکہ باؤلنگ اور فیلڈنگ میں بھی اپنی صلاحیتوں کا لوہا منوایا اور 2009 میں پاکستان کو ٹی ٹوئٹی ورلڈکپ جتوانے میں اہم کردار ادا کیا۔
