The news is by your side.

Advertisement

کراچی : تیز رفتار کار چار افراد کو کچلتی ہوئی پل سے نیچے جاگری

کراچی : لیاری ایکسپریس وے پر خوفناک حادثے میں چار افراد ہلاک ہوگئے، تیز رفتار کار راہ گیر کو بچاتے ہوئے پل سے نیچے جاگری، سڑک کے کنارے بیٹھے افراد زد میں آگئے۔

تفصیلات کے مطابق کراچی کے علاقے لیاری ایکسپریس وے پرمیرا ں ناکہ کے قریب ٹریفک حادثہ میں چار افراد جاں بحق ہوگئے، تیز رفتار کار 4 افراد کو کچلتی ہوئی پل سے نیچے جا گری، حادثے میں 4 افراد نے موقع پر ہی دم توڑ دیا جبکہ ایک شخص کے زخمی ہونے کی اطلاعات ہیں۔

تیز رفتار گاڑی لیاری ایکسپریس وے سے مرزا آدم خان روڈ پر جاگری، خوش قسمتی سے کار میں سوار تین افراد معجزانہ طور پر محفوظ رہے، پولیس نے جائے وقوعہ سے ڈرائیور سمیت 2 افراد کوحراست میں لے لیا۔

پولیس کو دیئے گئے بیان میں ڈرائیور کا کہنا تھا کہ حیدرآباد سےواپس شیرشاہ اپنے گھرجارہے تھے، مذکورہ مقام پر حادثہ اچانک گاڑی کے سامنےآجانیوالے شخص کو بچاتے ہوئے پیش آیا جس کے سبب گاڑی بے قابو ہوکر پل سے نیچے گرگئی۔

پولیس کے مطابق لاشوں اور زخمی کو سول اسپتال منتقل کر دیا گیا ہے۔ عینی شاہدین کے مطابق حادثے کا شکار گاڑی میں موجود بچے سمیت تین افراد معجزانہ طور پر محفوظ رہے۔

پولیس حکام کا کہنا ہے کہ جاں بحق ہونے والےچار میں سے تین افراد کی شناخت عامر، آصف، عادل کے ناموں سے ہوئی ہے جبکہ ایک متوفی کی شناخت تاحال نہ ہوسکی۔

پولیس کے مطابق حادثے میں معجزانہ طور پر بچ جانے والے افراد میں مہتاب، عباس اور 10 سالہ وارث شامل ہیں، کار سوار تینوں افراد آپس میں بھائی ہیں، گاڑی میں سوار دو بھائیوں کو تفتیش کے لئے تھانے جبکہ دس سالہ وارث کو گھر بھیج دیا گیا۔

Comments

یہ بھی پڑھیں