کراچی: مالی تنازعے نے دوست کے ہاتھوں دوست کی جان لے لی۔
تفصیلات کے مطابق ساؤتھ پولیس کی جانب سے جاری بیان کے مطابق لیاری کے رہائشی لیاری میں قاتل عبدالستار اور مقتول نوید خان میں مالی تنازعہ چل رہا تھا، تنازعے کے تصفیئے کے لئے عبدالستار نے نوید خان کو اپنے گھر بلایا اور قتل کردیا۔
پولیس کے مطابق مقتول نوید خان کو قتل کرنے کے بعد قاتل عبدالستار نےاپنی والدہ اور بھائی کو گھر بلایا اور سارا واقعہ بیان کردیا، اب تینوں نے مل کر لاش کو ٹھکانے لگانے کا منصوبہ بنایا اور طے کیا کہ رات گئے لاش کو پھینک دیں گے۔
مقتول نوید خان کی لاش کو ٹھکانے لگانے کے لئے ملزمان نے کرائے کی گاڑی منگوائی، لاش کو چادر میں لپیٹ کر گاڑی میں منتقل کرنے کے دوران کرائے کے ڈرائیور نے خون ٹپکتا دیکھ کر شور مچادیا، جس پر مرکزی ملزم وہاں سے فرار ہوگیا۔
یہ بھی پڑھیں: دہشت گردی میں ملوث مفرور ملزمان کے گرد گھیرا تنگ
پولیس نے جائے وقوعہ پر پہنچ کر لاش کو ضابطے کی کارروائی کے لئے سول اسپتال منتقل کیا ساتھ ہی ملزم کی والدہ اور بھائی کو گھر سے گرفتار کرتے ہوئے تھانے منتقل کردیا۔
پولیس نے مرکزی ملزم عبدالستار کی گرفتاری کے لئے ٹیمیں تشکیل دیتے ہوئے اس کی تلاش شروع کردی ہے، قاتل اور مقتول کے درمیان کتنے روپے مالیت کا تنازعہ چل رہا تھا اس بارے میں مرکزی ملزم کی گرفتاری کے بعد معلوم ہوسکے گا۔
