سڈنی : لائر برڈ یعنی بربطنی مور دنیا کا وہ خوبصورت پرندہ ہے جو کئی آوازیں نکالنے پر عبور رکھتا ہے، آسٹریلیا کے کوہستانی جنگلات میں پایا جانے والا یہ پرندہ باقی پرندوں سے کہیں زیادہ باصلاحیت اور دلچسپ ہے۔
کچھ مخصوص پرندے جیسے طوطوں کی کچھ اقسام ،ہندوستانی مینا اور موِکن برڈ اپنی آوازوں سے ہٹ کے دیگر آوازوں کو نقل کرنے اور بولنے کی صلاحیت رکھتے ہیں تاہم آسٹریلیا کے اس پرندے لائر برڈ یعنی بربطنی مور کو اس معاملے میں باقی پرندوں سے سبقت حاصل ہے کیونکہ اس میں قدرت نے بولنے کی بہت زیادہ باصلاحیت رکھی ہے۔
یہ ایک بھورے یا مٹیالے رنگ کا زمینی پرندہ ہے جس کا سائز نر میں 98 سینٹی میٹر جبکہ مادہ 84 سینٹی میٹر تک ہوتا ہے۔ نر مور کی دم خوبصورت اور بربط نما ہوتی ہے یہ پرندہ آسٹریلیا کے برساتی جنگلوں کا باسی ہے جس کی خوراک میں کئی قسم کے کیڑے مکوڑے،کیچوے، مینڈک اور چھپکلیاں شامل ہیں۔
ماہرین کے مطابق بربطنی مور اوسطاً 30 سال تک زندہ رہتا ہے، اس میں مادہ 5 سال جبکہ نر 8 سال کی عمر میں بالغ ہوجاتے ہیں۔
بربطنی مور اپنا گھونسلہ زمین پر بناتے ہیں، ایک سیزن میں مادہ بربط محض ایک انڈہ دیتی ہے جسے سِینے کی ذمہ داری بھی اسی کی ہوتی ہے اور 50 روز سینے کے بعد چوزے کو پالنے، خوراک دینے اور ساتھ رکھنے کا کام بھی مادہ کا ہوتا ہے۔
آوازوں کی نقالی :
برطانوی نشریاتی ادارے بی بی سی کی رپورٹ کے مطابق بربطنی مور کی یہ خاصیت ہے کہ یہ بیسیوں قسم کی مختلف آوازیں نکال سکتا ہے، آس پاس موجود تقریباً ہر چیز کی آواز کو با آسانی کاپی کرلیتا ہے۔
بربطنی مور جن چند آوازوں کو بولتا ہے ان میں آس پاس کے تقریباً 20 مختلف پرندوں کی آوازیں شامل ہیں، کار انجن اور کار الارم، کی آواز، گولی چلنے کی آواز، کیمرہ کلک کی آوازبخوبی نکال لیتا ہے۔
اس کے علاوہ میوزک اور موبائل فون کی رنگ ٹونز، کتے کے بھونکنے کی آواز، کوآلا اور ڈنگو جیسے مقامی جانوروں کی آوازیں، درخت پر آری چلنے کی آواز اور بہت سی دیگر آوازیں یہ بہت مہارت سے نکالتا ہے سننے والا حیرت سے ادھر دیکھتا رہ جائے کہ آواز آ کہاں سے رہی ہے۔
