site
stats
پاکستان

ٹریفک سارجنٹ کو کچلنے والے رکن اسمبلی کے ریمانڈ میں توسیع

کوئٹہ: صوبہ بلوچستان کے دارالحکومت کوئٹہ میں ٹریفک سارجنٹ کو گاڑی سے کچلنے کے ملزم مجید اچکزئی کے ریمانڈ میں توسیع کردی گئی۔ عدالت نے ملزم رکن اسمبلی کی درخواست ضمانت پر فیصلہ محفوظ کرلیا۔

تفصیلات کے مطابق ٹریفک سارجنٹ کو کچلنے کے ملزم رکن صوبائی اسمبلی مجید اچکزئی کو 5 روزہ ریمانڈ مکمل ہونے پر کوئٹہ کی انسداد دہشت گردی عدالت میں پیش کیا گیا۔

دوران سماعت ملزم کے وکلا نے ضمانت کے لیے درخواست جمع کروائی۔ عدالت نے دلائل سننے کے بعد ضمانت پر فیصلہ محفوظ کرلیا۔

عدالت نے ملزم کے ریمانڈ میں مزید 3 روز توسیع کرتے ہوئے سماعت 15 جولائی تک ملتوی کردی۔

یاد رہے کہ عبدالمجید اچکزئی نے چند روز قبل اپنی گاڑی سے سڑک پر کھڑے ٹریفک وارڈن کو کچل دیا تھا۔ سی سی ٹی وی فوٹیجز سامنے آنے کے بعد ایم پی اے کی گرفتاری عمل میں آئی اور چیف جسٹس آف پاکستان سپریم کورٹ نے بھی اس واقعہ کا از خود نوٹس لیا تھا۔

مزید پڑھیں: ٹریفک سارجنٹ کے اہل خانہ اور رکن اسمبلی کے درمیان صلح

اس دوران ملزم اور مقتول کے ورثا میں صلح کی خبریں سامنے آئیں تاہم ٹریفک سارجنٹ کے بھائی نے اس کی تردید کرتے کہا کہ شہید بھائی کے خون کا سودا نہیں کریں گے۔

ملزم کے خلاف تحقیقات کے بعد ملزم کئی اور مقدموں میں بھی اشتہاری نکل آیا اور عدالت نے پرانے کیسز کی دوبارہ سماعت شروع کردی۔

عبدالمجید اچکزئی پختونخواہ ملی عوامی پارٹی کے رکن ہیں اور وہ حلقہ پی بی 13 سے بلوچستان اسمبلی کے رکن منتخب ہوئے تھے۔


Print Friendly, PDF & Email
20

Comments

comments

اس ویب سائیٹ پر موجود تمام تحریری مواد کے جملہ حقوق@2018 اے آروائی نیوز کے نام محفوظ ہیں

To Top