کراچی : شہر قائد میں بجلی کے بڑے بریک ڈاؤن کے باعث نصف شہر کو بجلی کی فراہمی معطل ہوگئی ، جس سے شہریوں کوپریشانی کا سامنا ہے۔
تفصیلات کے مطابق کے الیکٹرک کی ہائی ٹینشن لائن ٹرپ کرگئی، جس کے باعث کراچی کے 30 گرڈ اسٹیشن بند ہوگئے، گرڈ اسٹیشن بند ہونے سے نصف کراچی کو بجلی کی فراہمی معطل ہوگئی ہے۔
بجلی کی بندش سے متاثر ہونے والے علاقوں میں نیوکراچی،گلشن اقبال،بفرزون،شادمان ، سرسیدٹاؤن،کلیانہ ٹاؤن،ناگن چورنگی،پی ایس ایچ ایس ، سرجانی، ایف بی ایریا، اورنگی ٹاؤن اورنارتھ ناظم آباد شامل ہیں جبکہ سائٹ انڈسٹریل زون ،نارتھ کراچی ،ایف بی ایریا ،کورنگی میں صنعتیں بھی بند ہوگئی۔
بجلی کے بریک ڈاؤن کے باعث شہریوں کو شدید گرمی میں مشکلات کا سامنا کرنا پڑرہا ہے۔
دوسری جانب کے الیکٹرک کا کہنا ہے کہ 220 کے وی ہائی ٹنشن لائن ٹرپ کر گئی ہے ، اس کی وجہ سے منسلک گرڈ پر بجلی کی فراہمی میں اثر آیا ، بحالی کا عمل شروع ہو چکا ہے اور ایک گھنٹے تک مکمل ہونے کا امکان ہے ، سسٹم میں لوڈ موجود ہے جس کی بنا پر بحالی کا عمل فوری ہونے کا امکان ہے۔
کے الیکٹرک کی 220 کے وی ہائی ٹنشن لائن ٹرپ کر گئی ہے
اس کی وجہ سے منسلک گرڈ پر بجلی کی فراہمی میں اثر آیا
بحالی کا عمل شروع ہو چکا ہے اور ایک گھنٹے تک مکمل ہونے کا امکان ہے
سسٹم میں لوڈ موجود ہے جس کی بنا پر بحالی کا عمل فوری ہونے کا امکان ہے
— KE (@KElectricPk) May 22, 2021
وزارت توانائی کی جانب سے ٹوئٹ میں کہا گیا ہے کہ کراچی کو بجلی فراہم کرنےوالی لائن این کے آئی بلدیہ ایک اور 2 میں ٹرپنگ ہوئی ، جس کی وجہ سےبجلی کی فراہمی متاثرہوئی ، الحمداللہ باقی ملک کا پورا نظام اس وقت بالکل معمول کےمطابق ہے، این ٹی ڈی سی اور کےالیکٹرک بجلی کی بحالی میں مصروف ہیں ، لائنیں ٹرپ ہونےکی وجوہات کی بھی تحقیقات کی جارہی ہیں۔
کراچی کو بجلی سپلائی کرنے والی NKI بلدیہ 1اور 2میں ٹرپنگ کی وجہ سے بجلی فراہمی متاثر ہوئی ہے تاہم الحمداللہ باقی ملک کا پورا سسٹم اس وقت بالکل نارمل ہے اور این ٹی ڈی سی اور کراچی الیکٹریک کے اہلکار بجلی بحالی میں مصروف ہیں ٹرپنگ کی وجوہات بھی انوسٹی گیٹ کی جارہی ہے
— Ministry of Energy (@MoWP15) May 22, 2021
خیال رہے رواں ہفتے تیز آندھی کے باعث بھی 900 کے قریب فیڈربند ہوئے تھے جبکہ کراچی میں گرمی بڑھتے ہی بجلی کی لوڈ شیڈنگ میں بھی اضافہ ہوگیا، شدید گرمی میں شہر میں بجلی کی 6 سے 7 گھنٹوں کی غیر اعلانیہ لوڈشیڈنگ کی جارہی ہے۔
کے الیکٹرک نے شہر کے مستثنیٰ علاقوں میں بھی لوڈ شیڈنگ شروع کردی ہے،علاقہ مکینوں کا کہنا تھا کہ اکثر علاقوں میں مرمت کے نام پر 10 سے 12 گھنٹے کی بجلی بند کرنا معمول بن گیا ہے۔۔