کراچی : قومی ایئر لائن (پی آئی اے) کا 2 رکنی وفد برطانیہ میں پہلی پرواز کے انتظامات کا جائزہ لینے مانچسٹر پہنچ گیا۔
تفصیلات کے مطابق قومی ایئر لائن (پی آئی اے) کی برطانیہ کے فلائٹ آپریشن کی تیاریاں اور انتظامات میں پیشرفت سامنے آئی۔
ذرائع کا کہنا ہے کہ قومی ایئر لائن کا 2 رکنی وفد برطانیہ میں پہلی پرواز کے انتظامات کا جائزہ لینے مانچسٹر پہنچ گیا، وفد میں چیف آپریٹنگ آفیسرخرم مشتاق اورجی ایم کوآرڈینیشن ذوالقرنین مہدی شامل ہیں۔
ذرائع نے بتایا کہ قومی ایئر لائن کی پروازوں پرپابندی ہٹنے کے بعد پہلی پرواز 14 اگست سےچلانےکی تیاری ہے، وفد برطانیہ کے فلائٹ آپریشن سے قبل انتظامات پر جائزہ رپورٹ پیش کرے گا۔
ذرائع نے کہا کہ پی آئی اے نےابتدائی طور پراسلام آبادمانچسٹرمیں ہفتہ وار 4پروازیں چلانے کا پلان تیار کرلیا ہے، مانچسٹر کے بعد پی آئی اے کا لندن اور برمنگھم کی پروازوں کو بھی شروع کرنے کا پلان ہے۔
مزید پڑھیں : آئندہ ماہ اگست سے برطانیہ کیلئے فلائٹ آپریشن شروع کرنے کا اعلان
یاد رہے قومی ایئر لائن نے آئندہ ماہ اگست سے برطانیہ کیلئے فلائٹ آپریشن شروع کرنے کا اعلان کرتے ہوئے طیارے کو جدید خطوط پر استوار اور مکمل تیار رکھنے کی ہدایت کی۔
ذرائع کے مطابق قومی ایئر لائن کو یو کے سی اے اے سے فلائٹ آپریشن کیلئے درخواست پراجازت کاانتظار ہے، قومی ایئرلائن سمیت تمام پاکستانی ایئرلائنز پر 5 سال بعد برطانیہ میں پابندی ختم ہوچکی ہے۔
محمد صلاح الدین اے آروائی نیوز سے وابستہ سینئر صحافی ہیں اور ایوی ایشن سے متعلقہ امور کی رپورٹنگ میں مہارت رکھتے ہیں