اسلام آباد: میجر ریٹائرڈ خرم حمید روکھڑی نے کہا ہے کہ عمران خان نے سوشل میڈیا کا فائدہ اٹھایا اور نوجوانوں کو گمراہ کیا۔
اسلام آباد میں پریس کانفرنس کرتے ہوئے سابق پی ٹی آئی رہنما اور میجر ریٹائرڈ خرم حمید روکھڑی نے کہا کہ میرے آنے کی وجہ موجودہ صورتحال ہے، عمران خان کے اندر لیڈرشپ کی کوئی خصوصیت نہیں ہے۔
پی ٹی آئی کے رہنما خرم حمید خان روکھڑی نے کہا کہ میانوالی میں روکھڑی خاندان نے بہت سیاست کی ہے، ہم نے اپنی خاندانی پسند کو چھوڑ کر عمران خان کو جوائن کیا، سیاست میں اتار چڑھاؤ آتے ہیں ہم نے بھی دیکھے ہیں لیکن عمران خان کے اندر لیڈر شپ کی کوئی خصوصیت نہیں ہے۔
انہوں نے کہا کہ عمران خان کو ہمیشہ اپنے آگے لوگ جھکتے ہوئے اچھے لگتے ہیں، عمران خان نے سوشل میڈیا کا بھرپور فائدہ اٹھایا، عمران خان نے نوجوانوں کو گمراہ کیا، ہمیں سمجھ آچکی تھی کہ اس کا ایک ہی ایجنڈا ہے۔
خرم حمید خان روکھڑی نے پریس کانفرنس میں کہا کہ پولیٹیکل لیڈر شپ کا فرض ہے کہ اپنے اداروں کو مضبوط کریں، لیکن عمران خان نے ایسی تحریک شروع کی کہ یہ چاہتا تھا کہ ملک کو تباہ کر دیا جائے۔
ان کا مزید کہنا تھا کہ ہم اہلیت کے فروغ اورکرپشن کے خاتمے کے لیے اسکے ساتھ آئے تھے، اس کے دور میں ہر شعبہ زندگی میں خرابی ہوئی اور تباہی کے راستے کھلتے گئے۔
