مکہ معظمہ : کرین حادثے میں زخمی گیارہ پاکستانیوں کے نام قونصل خانے جاری کردئیے ہیں، یہ تمام پاکستانی سعودی عرب میں کنگ فیصل اور کنگ عبدالعزیز اسپتال میں زیرِ علاج ہیں۔
تفصیلات کے مطابق وزیرِاعظم نوازشریف کی ہدایت پر سفارتی عملہ سعودیہ عرب میں متحرک ہوگیا ہے، سفارتی عملے نے کرین حادثے میں شہید اور زخمی پاکستانیوں کی معلومات اکٹھی کرنا شروع کر دی ہیں ،علی الصبح قونصل خانے نے چند زخمی پاکستانی عازمین حج کے نام جاری کیے ہیں۔
کنگ فیصل اسپتال میں زیرِ علاج پاکستانیوں کے نام انعام صفدر، اللہ نواز، امبرو بی بی، تاجرہ بی بی ، نویدہ زہرہ، نذر حسین ہیں جبکہ کنگ عبدالعزیز اسپتال میں زیرِ علاج زخمی پاکستانیوں کے نام زاہد شاہ پشاور، تسلیم احمد کراچی، بخت ملیح خان کوہاٹ، زرینہ پروین کراچی، صداقت بیگم صوابی، قدر گل کا تعلق سوات سے ہے۔
دوسری جانب پاکستانی سفیر منظورالحق نے کہا ہے کہ مکہ مکرمہ میں کرین حادثے میں اگر کوئی پاکستانی عازمین حج شہید ہوا ہے تو اس کی تصدیق آج ہوجائے گی۔
اے آروائی نیوز سے خصوصی گفتگو میں سعودیہ میں تعینات پاکستانی سفیر منظورالحق نے کہا ہے کہ حادثے میں شہید پاکستانی عازمین حج کی معلومات اکھٹی کر نے کے حوالے سے سعودی حکومت کے ساتھ رابطے میں ہیں۔
ڈائریکٹرحج رافع شاہ نے کہا کہ پاکستانیوں کی شہادت کے حوالے سے متضاد اطلاعات ہیں ،پاکستانی عازمین حج کی شہادتوں کے حوالے سے حتمی رپورٹ آج واضح ہوجائے گی۔
گزشتہ روز مکہ معظمہ میں کرین حادثے کی خبراے آروائی نیوز پرنشر ہوتے ہی ہزاروں پاکستانی عازمین حج کے لواحقین میں تشویش کی لہر پائی جاتی ہے اور وہ اپنے پیاروں کی خیریت جاننے کیلئے بے قرار ہیں ۔
