اسلام آباد : پاکستان میں بھارتی دہشت گردی کے دستاویزی ثبوت مکمل کرکے امریکا بھجوا دیئے گئے ، ملیحہ لودھی اقوام متحدہ کے نئے سیکریٹری جنرل کے عہدہ سنبھالتے ہی یہ دستاویزات ان کے حوالے کریں گی۔
تفصیلات کے مطابق پاکستان نے بھارت کی پاکستان میں مداخلت کے تمام تر ثبوت مکمل کرکے ڈوزئیر تشکیل دے کر نیویارک میں پاکستانی مشن کو بھیج دیا ہے جو اقوام متحدہ کے سیکرٹری جنرل کو دیا جائے گا۔
ان ثبوتوں میں را کا ایجنٹ اور بھارتی بحریہ کا حاضر سروس افسر کلبھوشن یادیو کا اعترافی بیان ،بھارتی آبدوز کی پاکستانی پانیوں کے قریب موجودگی بھی شامل ہے۔
مذکورہ ڈوزیئر نیویارک میں پاکستانی مشن کو بھجوا دیا گیا ہے جسے جنوری کے دوسرے ہفتے اقوام متحدہ کے نئے جنرل سیکریٹری کے سامنے پیش کیا جائے گا۔ ڈوزیئر پر دفتر خارجہ میں بدھ کے روز سلامتی کونسل کے مستقل رکن ممالک کے سفارت کاروں کو بریفنگ بھی دی جائے گی۔
چند روز پہلے مشیر خارجہ سرتاج عزیز نے سینیٹ کمیٹی کو بتایا تھا کہ بھارتی مداخلت سے متعلق دستاویزی ثبوت اقوام متحدہ کو دیئے جا چکے ہیں، انہوں نے بتایا کہ کلبھوشن یادیو کے نیٹ ورکس کیخلاف کارروائیاں جاری ہیں۔
ذرائع کے مطابق ڈوزئیر میں سی پیک کی جاسوسی کرنے والی بھارتی آبدوز کا نہ صرف ذکر کیا گیا ہے کہ اس کی تصاویر اور ویڈیو بھی شامل کی گئی ہیں۔ پاکستان نے اس ڈوزئیر میں مطالبہ کیا ہے کہ اقوام متحدہ تمام شواہد کے پیش نظر معاملات کا نوٹس لے۔
