The news is by your side.

Advertisement

یواین امن مشن، پاکستانی فوجیوں کی قربانی کا اعتراف، شہدا کے لیے میڈلز

پاکستانی مندوب ملیحہ لودھی نے میڈلز وصول کیے

راولپنڈی: اقوام متحدہ نے امن مشن میں 7 پاکستانی فوجی جوانوں کی قربانیوں کا اعتراف کرتے ہوئے انہیں میڈلز سے نواز دیا۔

پاک فوج کے شعبہ تعلقات عامہ (آئی ایس پی آر) سے جاری بیان کے مطابق اقوام متحدہ میں بین الاقوامی پیس کیپرزڈے کا انعقاد کیا گیا جس میں عالمی امن کے مشن پر امور سرانجام دینے والے پاکستانی فوجیوں کی قربانیوں کا اعتراف کیا گیا۔

اقوام متحدہ نے امن کے لیے قربانیاں دینےوالے7پاکستانی فوجیوں کو ڈیگ ہیمرشولڈمیڈل دیئے جو یو این میں تعینات پاکستانی مندوب ملیحہ لودھی نے وصول کیے۔

اس موقع پر آرمی چیف آف اسٹاف جنرل قمر جاوید باجوہ کا کہناتھا کہ پاکستان امن سے محبت کرنےوالا ملک ہے اس لیے امن کی عالمی کوششوں میں ہم اپنا بھرپور کردار ادا کررہے ہیں۔

واضح رہے کہ  گزشتہ ماہ نیویارک میں واقع اقوام متحدہ کے ہیڈ کوارٹرز میں عالمی امن کی خاطر جان قربان کرنے والے اہلکاروں کی یاد میں خصوصی تقریب کا انعقاد کیا گیا تھا جس میں یو این کے سیکریٹری جنرل ایٹونیو گٹرز نے بطور مہمان خصوصی شرکت کی تھی۔

اقوام متحدہ کے سیکریٹری جنرل نے پاکستانی امن مشن کے شہیدوں کو بھرپور انداز میں خراج عقیدت پیش کرتے ہوئے عالمی سطح پر پاکستان کو بڑے اعزاز سے نوازا تھا۔

مزید پڑھیں: امن مشن، اقوام متحدہ کا 7 شہید پاکستانی اہلکاروں کے لیے اعزاز

پاک فوج کے شعبہ تعلقات عامہ (آئی ایس پی آر) سے جاری بیان میں کہا گیا تھا کہ اقوام متحدہ کے امن مشن دستوں میں پاکستان کا شمار اُن ممالک میں ہوتا ہے جن کے فوجیوں کی تعداد سب سے زیادہ ہے۔ آئی ایس پی آر سے جاری بیان میں کہا گیا تھا کہ اقوام متحدہ کے امن مشنز میں اب تک 156 پاکستانی فوجی جوان جام شہادت نوش کرچکے۔

اقوام متحدہ میں منعقد ہونے والی تقریب میں پاک فوج کے نائیک قیصر عباس، سپاہی یاسر عباس، سپاہی محمد اشتیاق عباسی، حوالدار ذیشان احمد، سپاہی حضرت بلال، نائیک عبدالغفور اور نائیک عطا الرحمان کو اعزاز سے نوازا گیا تھا۔


خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

Comments

comments

یہ بھی پڑھیں