افریقی ملک مالی میں چیک پوسٹ پر نامعلوم افراد کے حملے میں 53 فوجی ہلاک ہوگئے تاہم اب تک کسی گروپ نے اس حملے کی ذمہ داری قبول نہیں کی.
تفصیلات کے مطابق بین الاقوامی میڈیا رپورٹس میں بتایا گیا ہے کہ نامعلوم مسلح افراد نے نائجر سرحد کے قریب میناکا ریجن میں واقع ملکی سیکورٹی فورسز کی چیک پوسٹ پر حملہ کردیا جس کے نتیجے میں 53 فوجی مارے گئے۔
اس حملے کو مالی کی تاریخ میں رواں دہائی کا سب سے خونریز واقعہ قرار دیا گیا ہے جب کہ فوج نے اپنی ٹوئٹ کہا ہے کہ یہ دہشتگردانہ حملہ ہے۔
وزیر اطلاعات کا کہنا ہے کہ حملے میں 10 افراد معجرانہ طور پر محفوظ رہے ہیں اور انہیں بحفاظت ریسکیو کرلیا گیا ہے تاہم اب تک کسی گروپ نے اس حملے کی ذمہ داری قبول نہیں کی۔
حملے کے بعد مذکورہ ریجن میں سیکورٹی فورسز کے اضافی دستے تعینات کردیے گئے ہیں اور علاقے کو گھیرے میں لے کر سرچ آپریشن شروع کردیا گیا ہے۔
مالی میں پرتشدد واقعہ کا سلسلہ 2012 سے اس وقت شروع ہوا جب شدت پسند تنظیم نے فرانس کی مدد سے ملک کے شمالی حصے پر قبضہ کرلیا تاہم ملکی افواج نے شدت پسندوں سے علاقے کا قبضہ چھڑوا کر کنٹرول حاصل کرلیا تھا۔
رواں سال ستمبر کے آخر میں اسی طرح کے ایک حملے میں 38 فوجی ہلاک ہوگئے تھے، حملہ آوروں نے دو فوجی کیمپس پر دھاوا بول کر وہاں موجود فوجیوں کو موت کے گھاٹ اتارا تھا۔
