اسلام آباد : پاکستان میں بھارتی دہشت گردی کے دستاویزی ثبوت اقوام متحدہ کے حوالے کردیئے گئے، ملیحہ لودھی نے سیکریٹری جنرل یو این کو مشیر خارجہ سرتاج عزیز کا خط بھی دے دیا۔
تفصیلات کے مطابق اقوام متحدہ میں پاکستان کی مستقل مندوب میلحہ لودھی نے پاکستان میں بھارتی مداخلت کے دستاویزی ثبوت اقوام متحدہ نے نئے سیکریٹری جنرل انٹونیو گوتریس کے حوالے کردیئے ہیں اس کے علاوہ انہوں نے مشیر خارجہ سرتاج عزیز کا خط بھی ان کے حوالے کیا ہے۔
یاد رہے کہ پاکستان نے اکتوبر 2015ء میں بھی بھارتی مداخلت کے 3 ڈوزیئر اقوام متحدہ کو دئیے تھے۔ مشیر خارجہ سرتاج عزیزنے اقوام متحدہ کے نئے سیکریٹری جنرل انٹونیو گوتریس کو لکھے گئے خط میں انہیں عہدہ سنبھالنے پر مبارکبادی دی اور ساتھ ہی مسئلہ کشمیر حل کرانے کی یاد دہانی بھی کرائی ہے۔
ترجمان دفترخارجہ کے مطابق مشیرخارجہ سرتاج عزیز نے اپنے خط میں بتایا ہے کہ پاکستان افغانستان میں امن واستحکام کیلئے پرعزم ہے۔ پاکستان کا انسداد دہشت گردی کی عالمی کوششوں میں اہم حصہ ہے، دہشت گردی کے خلاف جنگ میں ہم نے اہم کامیابیاں حاصل کیں۔
مشیرخارجہ سرتاج عزیز نے خط میں کلبھوشن یادیو کے بیان کا حوالہ بھی دیا ہے، انہوں نے کہا کہ پاکستان بھارت سمیت تمام ہمسایوں سے امن کی پالیسی پر گامزن ہے۔ ملکی سلامتی کو لاحق خطرات سے نمٹنے کے لیے تمام اقدامات کریں گے۔
سرتاج عزیز نے سیکریٹری جنرل سے مطالبہ کیا کہ یو این بھارت کو پاکستان میں عدم استحکام سے روکے، فراہم کردہ معلومات کی روشنی میں معاملات کا جائزہ لیا جائے، بھارتی سیاسی و عسکری قیادت کے حالیہ بیانات عکاس ہیں، بھارتی سرگرمیاں اقوام متحدہ کے چارٹر کی خلاف ورزی ہیں۔
مزید پڑھیں : بھارتی مداخلت کے دستاویزی ثبوت اقوام متحدہ کو دینے کی تیاری مکمل
انہوں نے کہا کہ ترقی کے لئے تنازعات کا پر امن حل ضروری ہے، اقتصادی ترقی اورخوشحالی علاقائی تعاون سے ہی ممکن ہے، پاکستان اپنی علاقائی خود مختاری کا ہر قیمت پر تحفظ کرے گا، مشیر خارجہ نے نئے سیکریٹری جنرل کو مسئلہ کشمیرکے حل کی یاد دہانی بھی کرائی۔
