امریکی گلوکارہ ٹیلر سوئفٹ کے گھر میں گھسنے کی کوشش کرنے والے شخص کو پولیس نے گرفتار کرلیا۔
امریکی میڈیا کی رپورٹ کے مطابق گلوکارہ ٹیلر سوئفٹ کے اپارٹمنٹ میں ایک شخص نے گھسنے کی کوشش کی جسے پولیس نے گرفتار کرلیا۔
فی الحال یہ معلوم نہیں ہوسکا کہ واقعے کے وقت امریکی گلوکارہ گھر پر موجود تھیں یا نہیں۔
پولیس کے مطابق ملزم نے گاڑی سے باہر نکلنے کے بعد ٹیلر سوئفٹ کی رہائشگاہ کے انٹرکام سسٹم کو کھینچ کر ہٹانے کی کوشش کی تھی۔
پولیس کا کہنا ہے کہ مذکورہ شخص ایک بار پھر گھر تک رسائی کی کوشش اور ناکامی پر واپس لوٹ گیا، بعدازاں اسے حراست میں لے لیا گیا۔
نیویارک پولیس ڈپارٹمنٹ کے مطابق اس پورے واقعے میں عمارت کو کوئی نقصان نہیں پہنچا۔
پولیس کے مطابق مذکورہ شخص پر نشے کی حالت میں ڈرائیونگ کرنے کا الزام عائد کیا گیا ہے۔ گاڑی سے شراب کی ایک بوتل بھی ملی ہے۔
امریکی میڈیا رپورٹ کے مطابق 32 سالہ گلوکارہ اس سے قبل بھی دھمکیوں، گھر پر حملے اور تعاقب کا نشانہ بن چکی ہیں۔