بھارتی ریاست ہریانہ کے شہر فرید آباد میں ملزمان نے آتشبازی سے منع کرنے پر طیش میں آ کر بزرگ شہری کو تشدد سے ہلاک کر دیا۔
میڈیا رپورٹس کے مطابق 65 سالہ شہری کو اُس وقت پیٹ پیٹ کر ہلاک کر دیا گیا جب اس نے علاقے میں ملزمان کو پٹاخے پھوڑنے سے منع کیا۔
مقتول کے بیٹے ونود کے مطابق ان کا ایک پڑوسی اور اس کے دوست دیوالی کی رات پٹاخے پھوڑ رہے تھے، جب والد بچن رائے نے اعتراض اٹھایا تو پہلے تلخ کلامی ہوئی تاہم بعد میں ملزم راجو، دھیرج اور نندو نے والد کی پٹائی کی۔
بچن رائے کو فوری طور پر اسپتال لے جایا گیا لیکن علاج کے دوران وہ زخموں کی تاب نہ لاتے ہوئے چل بسے۔ ونود اور اس کی اہلیہ نے مداخلت کی تو ملزمان نے ان پر بھی تشدد کیا۔
مقتول کی اہلیہ نے پولیس پر لاپرواہی کا الزام عائد کرتے ہوئے کہا کہ اطلاع دینے پر پولیس کی تین ٹیمیں موقع پر پہنچیں لیکن کارروائی کرنے کے بجائے انہوں نے دائرہ اختیار پر جھگڑا کیا۔
ملزمان کے خلاف بی این ایس کی متعلقہ دفعات کے تحت مقدمہ درج کیا گیا اور ان کی گرفتاری کیلیے پولیس ٹیمیں تشکیل دی گئیں۔
فرید آباد پولیس کے پی آر او یشپال سنگھ نے بتایا کہ ملزمان کے خلاف مقدمہ درج کر لیا گیا ہے اور ان کی گرفتاری کیلیے کوششیں جاری ہیں۔
انہوں نے بتایا کہ ہم پولیس ٹیموں کی طرف سے لاپرواہی کے الزامات کی بھی جانچ کر رہے ہیں اور اس کے بعد مناسب کارروائی کی جائے گی۔
