The news is by your side.

Advertisement

فیصل آباد، نامعلوم ڈرائیور زیادتی میں ناکامی پر بچے کا گلا کاٹ کر فرار

فیصل آباد: پنجاب کے شہر فیصل آباد میں نامعلوم ڈرائیور زیادتی کی کوشش میں ناکامی پر 15 سالہ بچے کا شیشے سے گلا کاٹ کر فرار ہوگیا۔

تفصیلات کے مطابق فیصل آباد میں نامعلوم ڈرائیور زیادتی کی کوشش میں ناکامی پر 15 سالہ عبداللہ کا شیشے سے گلا کاٹ کر فرار ہوگیا، زخمی بچے کو سول اسپتال منتقل کردیا گیا جہاں اس کی حالت خطرے سے باہر بتائی جارہی ہے۔

نمائندہ اے آر وائی نیوز کے مطابق فیصل آباد کے علاقے اسلام نگر کا رہائشی 15 سالہ عبداللہ جمعرات کو دربار بابا نور شاہ والی جارہا تھا، جنرل بس اسٹینڈ میں ایک نامعلوم بس ڈرائیور اسے زبردستی اپنے ساتھ جھال انڈر پاس کے قریب لے گیا اور زیادتی کرنے کی کوشش کی۔

عبداللہ کی جانب سے مزاحمت کرنے پر ملزم نے شیشے کے ٹکڑے سے اس کے گلے پر وار کیا جس سے وہ زخمی ہوگیا، ملزم اسے زخمی کرنے کے بعد فرار ہوگیا۔

دوسری جانب آر پی او فیصل آباد غلام محمود نے بچے سے زیادتی میں ناکامی پر گلا کاٹنے کا نوٹس لیتے ہوئے سی پی او سے فوری رپورٹ طلب کرلی ہے۔

آر پی او نے تھانہ فیکٹری ایریا پولیس کو ملزم کے خلاف مقدمہ درج کرکے اسے فوری گرفتار کرنے کا بھی حکم دیا۔

واضح رہے کہ پنجاب میں گزشتہ سات ماہ میں 126 بچوں سے زیادتی کے کیسز رپورٹ ہوئے ہیں اور 129 ملزمان کو ان کیسز میں نامزد کیا گیا ہے۔

Comments

comments

یہ بھی پڑھیں