ٹی ٹوئنٹی ورلڈکپ میں پاکستان اور بھارت کا اعصاب شکن میچ دیکھنے والا شائق دل کا دورہ پڑنے سے موت کے منہ میں چلا گیا۔
یہ واقعہ بھارتی ریاست آسام کے ضلع شیواساگر میں پیش آیا جہاں مقامی سنیما میں میچ دیکھنے والا شخص ہارٹ اٹیک کے باعث چل بسا۔
بھارتی میڈیا کے مطابق مرنے والے شخص کی شناخت بٹو گوگوئی کے نام سے ہوئی ہے جس کی عمر 34 سال ہے۔
پولیس افسر کا کہنا ہے کہ گوگوئی اپنے چند دوستوں کے ساتھ اتوار کی شام ایک مقامی سنیما میں پاک بھارت براہ راست میچ دیکھ رہا تھا۔
سنیما ہال لوگوں سے کھچا کھچ بھرا ہوا تھا کہ اس دوان گوگوئی اچانک بےہوش ہو کر گرِ پڑا جسے دوستوں نے فوری طور پر اسپتال منتقل کیا جہاں ڈاکٹرز نے اسے مردہ قرار دے دیا۔
ڈاکٹروں کے مطابق گوگوئی کو کرکٹ میچ کے دوران سنیما ہال میں پیدا ہونے والی صورتحال کے باعث دل کا دورہ پڑا جو جان لیوا ثابت ہوا۔
ان کے اہل خانہ کا کہنا تھا کہ گوگوئی صحت مند تھے اور انہیں صحت سے متعلق کوئی مسئلہ نہیں تھا۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں