بھارت میں ایک درمیانی عمر کا شخص بھانجی کی شادی میں شرکت کے دوران رقص کرتے ہوئے اچانک دل کا دورہ پڑنے سے چل بسا، واقعے کی ویڈیو سوشل میڈیا پر وائرل ہوگئی۔
بھارتی میڈیا کے مطابق واقعہ ریاست چھتیس گڑھ میں پیش آیا، مذکورہ شخص کی شناخت دلیپ کے نام سے ہوئی ہے۔
واقعے کی وائرل ہونے والی ویڈیو میں دیکھا جاسکتا ہے کہ مذکورہ شخص اپنی بھانجی کی شادی میں شریک ہے، اور دلہا اور دلہن کے ساتھ اسٹیج پر رقص کر رہا ہے۔
پس منظر میں نہایت بلند آواز میں گانے چل رہے ہیں۔
ڈانس کرتے ہوئے اچانک وہ شخص رکتا ہے اور بے چینی محسوس کرتے ہوئے نیچے بیٹھتا ہے، اس کے بعد اچانک وہ نیچے گرتا ہے اور بے حس و حرکت ہوجاتا ہے۔
اہلخانہ کے مطابق اسپتال منتقل کرنے کے بعد ڈاکٹروں نے ہارٹ اٹیک سے ان کی موت کی تصدیق کردی۔
یاد رہے کہ گزشتہ کچھ برسوں سے رقص یا سخت ورزش کے دوران دل کی حرکت رک جانے اور موت واقع ہوجانے کے واقعات خاصے بڑھ گئے ہیں اور طبی ماہرین نے اس پر تشویش کا اظہار کیا ہے۔
