The news is by your side.

Advertisement

لندن کے بینک میں ایک شخص کی پستول کی جگہ ’کیلے سے ڈکیتی‘ کی واردات

لندن: برطانوی دارالحکومت لندن میں ایک بے گھر شخص نے پلاسٹک کی تھیلی میں کیلے کو لپیٹ کر پستول ظاہر کرکے بینک لوٹنے کی کوشش کی تاکہ گرفتاری کی صورت میں اسے رہنے کے لیے ٹھکانہ اور پیٹ بھرنے کے لیے کھانا میسر آسکے۔

غیرملکی خبررساں ادارے کے مطابق لندن میں ایک شخص نے پلاسٹک کی تھیلی میں کیلا چھپا کر بینک برانچ میں ڈکیتی کی اور ایک ہزار پاؤنڈ سے زائد کی رقم لوٹ لی تاہم ملزم نے فوری طور پر خود کو پولیس کے حوالے کردیا۔

پولیس نے ملزم جیمز کو بعدازاں عدالت میں پیش کیا، جہاں جج روبرٹ پاسن نے انہیں مجموعی طور پر 14 ماہ قید کی سزا سنائی جسے سن کر ملزم خوش ہوا۔

ملزم جیمز 14 ماہ کی سزا سن کر ایک جانب خوش ہوا پھر افسردہ ہوکر کہنے لگا کہ 14 ماہ بعد رہنے کی جگہ اور مفت کھانے سے محروم ہوجائے گا۔

علاوہ ازیں ملزم کے وکیل نے عدالت میں موقف اختیار کیا کہ میرے موکل نے کسی شخص یا املاک کو نقصان نہیں پہنچایا، نہ ہی لوٹی ہوئی رقم استعمال کی اور انہوں نے وقوعہ کے بعد خود گرفتاری دی لہٰذا انہیں بری کیا جائے۔

دوسری جانب پراسیکیوٹر نے کہا کہ اس کے باوجود کہ ملزم نے خود کو فوری طور پر پولیس کے حوالے کردیا اور لوٹی گئی رقم بھی برآمد ہوگئی لیکن ملزم کی اس حرکت سے بینک کا کیشئر خوف زدہ ہوگیا اور یہ واقعہ بینک عملے اور صارفین کے لیے پریشانی کا باعث بنا۔

Comments

comments

یہ بھی پڑھیں