نئی دلی: نشے کے عادی ایک شخص نے مبینہ طور پر اپنے پورے خاندان کو رہیب سینٹر سے واپس آنے کے چند دن بعد قتل کر دیا۔
بھارتی میڈیا رپورٹ کے مطابق یہ واقعہ دارالحکومت نئی دلی کے علاقے پالم کے ایک گھر میں پیش آیا جہاں 25 سالہ کیشوو نے لڑائی کے بعد تیز دھار آلے کی مدد سے اپنی 75 سالہ دادی، 50 سالہ والد، والدہ اور 18 سالہ بہن کو قتل کر دیا۔
بھارتی پولیس نے کیشو کو جنوب مغربی دہلی کے پالم میں ان کے گھر سے لاشیں ملنے کے بعد گرفتار کرلیا، پولیس نے اس حادثے کی خوفناک تفصیلات بتاتے ہوئے کہا کہ کیشو نے بظاہر ان کے گلے کاٹنے کے لیے تیز دھار چیز کا استعمال کرتے ہوئے متعدد بار ان پر وار کیا۔
پولیس حکام نے بتایا کہ تمام لاشیں گھر کے مختلف مقامات سے برآمد ہوئیں اور ملزم نے سب کو پے درپے وار کر کے بے دردی سے قتل کیا، ملزم کے والدین کی لاشیں باتھ روم سے برآمد ہوئیں جبکہ دادی اور بہن کی لاشیں کمرے سے ملیں۔
بھارتی پولیس نے بتایا کہ کیشو نے ایک ماہ قبل گڑگاؤں میں نوکری چھوڑ دی تھی اور وہ بے روزگار تھا۔پولیس کا کہنا ہے کہ فیملی کے قتل کے دوران بھی وہ منشیات کے زیر اثر تھا۔
پولیس حکام کا بتانا ہے کہ کیشوو گھر سے فرار ہونے کا منصوبہ بنا رہا تھا کہ اس کے گھر والوں نے اسے پکڑ لیا اور اسے گھر میں بند کر دیا، ملزم کیشوو چند روز قبل ہی مرکز بحالی صحت سے واپس گھر لوٹا تھا۔
