نئی دہلی: بھارت میں ایک شخص نے فٹ پاتھ پر سوئی ہوئی بھکارن پر حملہ کر کے اس کا گلا دبا کر اسے مار ڈالا، ملزم کا چہرہ سی سی ٹی وی فوٹیج میں ریکارڈ ہوگیا جس کے بعد پولیس اسے تلاش کر رہی ہے۔
بھارتی میڈیا کے مطابق اندور شہر میں ایک شخص نے فٹ پاتھ پر سوئی ہوئی بھکارن کو گلا دبا کر قتل کردیا، ملزم کا چہرہ سی سی ٹی وی ویڈیو میں آگیا، جس کی ویڈیو سوشل میڈیا پر وائرل ہورہی ہے۔
میڈیا رپورٹ کے مطابق بھکارن کو قتل کرنے کا واقعہ اندور شہر کے ایم وائی اسپتال کے باہر پیش آیا، ویڈیو میں دیکھا جاسکتا ہے کہ طلوع آفتاب سے پہلے ایک شخص نے فٹ پاتھ پر سوئی ہوئی عورت پر اچانک حملہ کردیا۔
اس شخص نے عورت کے بال پکڑ کر اسے گھسیٹا اور گلے میں رسی ڈال کر اس کا گلا دبایا، عورت نے اپنے اوپر ہونے والے حملے پر مزاحمت کی کوشش کی تاہم وہ ناکام رہی۔
ملزم نے کافی دیر تک عورت کے گلے کو رسی سے جکڑے رکھا جس سے وہ دم گھٹنے سے ہلاک ہوگئی۔
پولیس نے سی سی ٹی وی فوٹیج دیکھنے کے بعد مذکورہ شخص کی تلاش شروع کردی ہے، تاحال قتل کی وجہ معلوم نہیں ہوسکی۔
